भारतमा एकैदिन २ लाख ५८ हजार संक्रमित, ३८५ जनाको मृत्यु

काठमाडौँ । छिमेकी मुलुक भारतमा कोरोनाको तेस्रो लहर शुरु भएको छ । हरेक दिन कोरोनाको संक्रमण फेरी बढेपछि तेस्रो लहर शुरु भएको विज्ञहरुले बताएका छन् ।

भारतीय स्वास्थ्य मन्त्रालयले दिएको जानकारी अनुसार पछिल्लो २४ घण्टामा २ लाख ५८ हजार ८९ जनामा ​​कोरोना संक्रमण पुष्टि भएको छ भने ३८५ जनाको मृत्यु भएको छ ।

आज संक्रमितको संख्या आइतबारको तुलनामा १३ हजार कम देखिएको छ ।

भारतमा दैनिक संक्रमित दर परिक्षण गरिएको संख्याको १६.६६ प्रतिशत रहेको छ । 

त्यस्तै भारतमा एकै दिन एक लाख ५१ हजार ७४० जना कोरोना संक्रमणबाट निको भएको मन्त्रालयले जनाएको छ ।

त्यस्तै भारतमा कोरोनाको नयाँ भेरिएन्ट ओमिक्रोनका केसहरू पनि बढिरहेका छन् । अहिलेसम्म भारतका २७ राज्यमा ओमिक्रोन भेरिएन्टका ८२०९ केसहरू रिपोर्ट गरिएको मन्त्रालयले जनाएको छ । 

योसँगै भारतमा सक्रिय कोरोना संक्रमितको कुल संख्या १६ लाख नाघेको छ । अहिले भारतमा १६ लाख ५६ हजार ३४१ कोरोनाका सक्रिय केस रहेका छन् ।

हालसम्म कोरोना संक्रमणबाट कूल ४ लाख ८६ हजार ४५१ जनाको मृत्यु भएको स्वास्थ्य मन्त्रालयले जानकारी दिएको छ ।