सिम्पानी न्यूज, काठमाडौं ।
शिक्षा, विज्ञान तथा प्रविधि मन्त्रालयले ‘प्राविधिक तथा व्यावसायिक तालिमसम्बन्धी कानुनलाई संशोधन र एकीकरण गर्न बनेको विधेयक’ माथि सरोकारवाला र सर्वसाधारणसँग सुझाव माग गरेको छ। गुणस्तरीय प्राविधिक शिक्षा र सीप विकासको अवसरलाई सबैको पहुँचमा पुर्याउने उद्देश्यका साथ तयार पारिएको यो विधेयकलाई मन्त्रालयले आफ्नो आधिकारिक वेबसाइटमा सार्वजनिक गर्दै सुझाव आह्वान गरेको हो।
शिक्षा र तालिमलाई प्रत्यक्ष रूपमा सीप, श्रम, रोजगारी, उत्पादन र समृद्धिसँग जोड्ने लक्ष्यसहित यो नयाँ कानुन ल्याउन लागिएको मन्त्रालयले जनाएको छ।
विधेयकका मुख्य विशेषता र उद्देश्य:
- दक्ष जनशक्ति उत्पादन: मुलुकको सामाजिक तथा आर्थिक रूपान्तरणमा योगदान पुर्याउन सक्ने आधारभूत, मध्यम तथा उच्चस्तरको प्राविधिक जनशक्ति उत्पादन गर्ने।
- नयाँ एकीकृत कानुन: विगत ३८ वर्षदेखि कार्यान्वयनमा रहेको पुरानाे ‘प्राविधिक शिक्षा तथा व्यावसायिक तालिम परिषद् (CTEVT) ऐन, २०४५’ लाई खारेज गरी समयसापेक्ष नयाँ एकीकृत विधेयक प्रस्ताव गरिएको छ।
- परिषद्को अधिकार परिमार्जन: नयाँ विधेयकमा परिषद्लाई श्रम बजारको माग र आवश्यकताका आधारमा पाठ्यक्रम विकास गर्ने, शिक्षण संस्थाहरूलाई सम्बन्धन दिने र शिक्षालयहरूको मापदण्ड निर्धारण गर्ने पूर्ण अधिकार दिइएको छ।
मन्त्रालयले यो विधेयकलाई थप व्यावहारिक, सान्दर्भिक र सरोकारवालामैत्री बनाउनका लागि शैक्षिक विज्ञ, नागरिक समाज र सर्वसाधारणलाई यथाशीघ्र आफ्ना रचनात्मक सुझावहरू पठाउन आग्रह गरेको छ।








































