नेपाल उद्योग परिसंघका पूर्व अध्यक्ष विष्णु अग्रवालको स्वामित्वमा रहेको मोरङ अटो वर्क्स (एमएडब्ल्यू)ले चीनबाट भित्र्याएको सेरेस मिनी ईभीमा गम्भीर समस्या देखिन थालेको छ ।
गत सालको भदौमा नेपाली बजारमा सार्वजनिक भएको सेरेस कम्पनीको मिनी ईभीमा ब्रेक, रेन्ज, पिकअप र स्टेरिङमा समस्या देखिएपछि कम्पनीले ७ वटा गाडी फिर्ता लिएको छ
सम्पर्कमा आएका २ जना ग्राहकले गाडी किनेको केही दिनमै स्टेरिङ हल्लिन थालेको बताए । राम्रोसँग ब्रेकसमेत नलाग्ने समस्या देखिएको उक्त ईभीले सामान्य उकालो पनि तान्न नसकेको उनीहरूको गुनासो छ ।
‘सोह्रखुट्टेकै उकालो तानेन,’ एक ग्राहकले भने, ‘काठमाडौंमा राम्रोसँग चलाउँला भनेर किनेको गाडी सामान्य खाल्डाखुल्डी र उकालोमै चल्न नसकेपछि त हामी के गर्ने ?’
नाम उल्लेख नगर्ने शर्तमा उनले थपे, ‘कम्पनीका चिनियाँ प्रतिनिधि नै आएर हाम्रो गाडी हेरिरहेका छन् । अहिलेसम्म गाडी शो-रूममै छ । लिन बोलाएका छैनन् । हामीले गाडीभन्दा पनि पैसा रिफन्ड मागिरहेका छौं ।’
कम्पनीले गाडी फिर्ता लिएको विषयलाई बाहिर नल्याउन अनुरोध गरेको उनको भनाइ छ ।
‘बाहिर गयो भने यसले कम्पनीको रेप्युटेसनमा हान्छ, तपाईंलाई नयाँ गाडी अथवा अन्य कुनै विकल्पमा हामी सघाउँछौं भनेका छन्,’ उनले भने ।
गाडीको पैसा रिफन्ड नगरे कानूनी उपचार खोज्ने उनीहरूको भनाइ छ ।







































