सिम्पानी न्यूज, काठमाडौँ। प्रतिपक्षी दल नेकपा (एमाले) ले वर्तमान बालेन शाह नेतृत्वको सरकारको सयदिने कार्यकाल सुशासन र शासकीय सुधारका दृष्टिकोणले पूर्णतः असफल भएको निष्कर्ष निकालेको छ।
सरकार गठनको १०० दिन पुगेको अवसरमा शुक्रबार पार्टी मुख्यालय च्यासलबाट महासचिव शंकर पोखरेलद्वारा जारी प्रेस वक्तव्यमा सरकारका कामहरू अत्यन्त फितलो, अपरिपक्व र विवादास्पद देखिएको आरोप लगाइएको छ। एमालेले सरकारले आफ्नो सयबुँदे वाचापत्र र आमजनताको अपेक्षाअनुरूप काम गर्नुको साटो सस्तो चर्चा र विवादास्पद निर्णयहरूमा मात्रै रुचि देखाएको टिप्पणी गरेको छ।
एमालेले उठाएका मुख्य बुँदा र आरोपहरू:
- नीतिगत र संवैधानिक विचलन: संविधान संशोधन जस्तो गम्भीर विषयमा सहमति खोज्ने बहानामा दलहरूसँग न्यूनतम परामर्श नगरी कार्यदल गठन गरिएको र संघीयता विरोधी अभ्यास गर्दै केन्द्रबाट प्रत्यक्ष शासन चलाउन खोजिएको।
- पूर्वप्रधानमन्त्री र पूर्वगृहमन्त्रीको पक्राउ प्रति आक्रोश: पर्याप्त तथ्य र प्रमाणविना हतार-हतार पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई गिरफ्तार गरिएको तर १३ दिनसम्म अभियोजनको आधारसमेत देखाउन नसक्नुले ‘सुशासनको आवरणमा प्रतिशोध र स्वेच्छाचारिता’ प्रष्ट पारेको।
- आफ्नालाई काखा, अरूलाई पाखा: अख्तियार दुरुपयोग अनुसन्धान आयोग छँदाछँदै सस्तो लोकप्रियताका लागि असंवैधानिक रूपमा सम्पत्ति छानबिन आयोग गठन गरिएको र बहालवाला मन्त्री तथा सांसदहरूलाई त्यसको दायराभन्दा बाहिर राखिएको। सम्पत्ति शुद्धीकरणको नाममा पछिल्लो समय पूर्वउपप्रधानमन्त्री तथा अर्थमन्त्री विष्णुप्रसाद पौडेललाई सिकार बनाइएको।
- प्रशासनिक क्षेत्रमा असफल र डरको शासन: चालू खर्च घटाउने नाममा मन्त्रालयको संख्या घटाए पनि सचिवालय र सल्लाहकारको फौज भर्ती गरेर थप आर्थिक भार थपिएको। निजामती सेवा र शासकीय सुधारका नाममा डर र त्रासको वातावरण सिर्जना गरिएको।
- परराष्ट्र नीतिमा गम्भीर चूक: ‘नेपालले भारतको जग्गा मिचेको’ भन्ने जस्तो विवादास्पद अभिव्यक्ति दिएका प्रधानमन्त्रीले संसद्को सामना गर्न नसकेर भाग्नुपर्ने परिस्थिति बनेको र नेपाललाई ‘बफर स्टेट’ का रूपमा चित्रण गरेर देशको ऐतिहासिक गौरव र स्वाभिमान कमजोर बनाइएको।
नेकपा (एमाले) द्वारा जारी प्रेस वक्तव्यको पूर्ण पाठ:
बिहानीले दिनको संकेत गर्छ भनेझैँ सय दिनको सरकारको कामले मुलुकको आर्थिक संकट समाधान गर्न र विधिको शासन कायम गर्न यो सरकार पूर्णरूपमा असफल सावित भएको एमालेको ठहर छ। एमाले केन्द्रीय कार्यालयद्वारा जारी आधिकारिक प्रेस वक्तव्यको ५ पृष्ठको पूर्ण रूप तल प्रस्तुत गरिएको छ:












































