विश्व सामाजिक मञ्चको १६ औँ सम्मेलन बिहीबारदेखि राजधानीमा सुरु हुने भएको छ । काठमाडौंमा बुधबार पत्रकार सम्मेलनको आयोजना गरी मञ्चले ‘अर्को विश्व सम्भव छ’ भन्ने नाराका साथ फागुन ३ देखि ७ गतेसम्म सम्मेलन आयोजना हुने जानकारी दिएको हो ।
वैकल्पिक सोच र विचारहरू निर्माण गर्न र नयाँ नीति–संरचनाहरू निर्माण गर्न विश्वव्यापी रूपमा दबाब सृजना गर्ने अपेक्षाका साथ सम्मेलनको आयोजना गर्न लागेको आयोजकले जनाएका छन् ।
काठमाडौंको भृकुटीमण्डपमा हुने सम्मेलनमा १३ वटा मूल विधामा आधारित भएर ठूला साना गरी ४ सय २ वटा कार्यक्रमहरू र विश्वभरबाट ९२ देशका १ हजार २ सय ५२ वटा संस्था तथा समूहहरू स्वआयोजकका रूपमा दर्ता भएको जनाइएको छ ।
मञ्चले करिब ४० देखि ५० हजार जनाको सहभागिता रहने अपेक्षा गरेको छ ।







































