काठमाडौँ, सोमबार, २ चैत्र २०७७ । नेकपा एमालेका अध्यक्ष एवम् प्रधानमन्त्री केपी शर्मा ओली र वरिष्ठ नेता माधवकुमार नेपाल बीच भेटवार्ता हुने भएको छ ।
सोमबार बिहान ११ बजे केन्द्रीय कार्यालय धुम्बाराहीमा प्रधानमन्त्री ओली र वरिष्ठ नेता नेपालबीच भेटवार्ता हुन लागेको हो । एमालेभित्र बढ्दो विवादका बीच उनीहरुको भेटवार्ता हुन लागेको हो । ओलीले बालुवाटार बोलाए पनि नेपालले अस्विकार गर्दै धुम्बाराहीमा भेटौँ भनेपछि भेटवार्ता हुने तय भएको बताइएकाे छ ।
भेटवार्तामा प्रधानमन्त्री ओलीसहित महासचिव ईश्वर पोखरेल,उपमहासचिव विष्णु पौडेल र सचिव प्रदिप ज्ञवाली सहभागी हुनेछन् भने नेपाल पक्षबाट झलनाथ खनाललगायत अन्य दुई नेता सहभागी हुने बताइएको छ ।
गत पुस ५ गते संसद विघटन भएयता ओली र नेता नेपालबीच भेटवार्ता भएको छैन । हाल सर्वोच्च अदालतले संसद विघटन खारेज तथा एकिकृत नेकपा पनि भंग गर्दै एमाले र माओवादी केन्द व्यूँताइदिएको छ । एमाले व्युँतिएपछि ओलीले एकलौटाी ढंगले नेपाल पक्षका नेताहरुको जिम्मेवारी खोसेर अन्यलाई दिएका छन् । नेपाल पक्षले पनि समानान्तर प्रदेश तथा विभागीय कमिटी गठन गरेको छ ।








































