काठमाडौँ, शुक्रबार, २८ कात्तिक २०७७। बलिउड अभिनेत्री मनिषा कोइरालाले ‘मनिषा कोइराला क्यान्सर एजुकेशन फण्ड’ सुरु गरेकी छन् । बिहीबार एक कार्यक्रमका बीच उक्त फण्डको औपचारिक घोषणा गरिएको हो । ग्लोबल कलेजसँगको सहकार्यमा सुरु भएको यस फण्डको सर्वाधिकार मनिषा कोइराला आफैँसँग रहने छ ।
मनिषा अरूको पीडामा मद्दत गर्ने कार्यको सुरुवात गर्न लागेकोमा निकै गर्व अनुभूत गरिरहेको बताउँछिन् । उनी भन्छन्, ‘परिवारमा कसैलाई क्यान्सर लाग्दा परिवारलाई निकै गाह्रो पर्छ । आफ्नो सारा सम्पत्ति उपचारमा खर्चिन्छन् । त्यो समय उक्त परिवारको बालबच्चाले पढ्न पाएका हुँदैनन् । त्यो समयमा सहयोग गर्न पाउनु त गर्वको कुरा हुन्छ ।’
यस फण्ड सुरुवात गर्नुको उद्देश्य क्यान्सरपीडित विद्यार्थीको पढाइमा सहयोग गर्नु भएको ग्लोबल कलेजका प्रिन्सिपल डा. करण सिंह ठगुन्नाले बताए । उनका अनुसार क्यान्सरपीडित विद्यार्थीका लागि विभिन्न शीर्षकमा यस फण्डबाट छात्रावृत्ति दिइनेछ । छात्रावृत्ति ‘क्यास’ तथा ‘नन-क्यास’ हुने उनले बताए ।
क्यानसरबाट पीडित भएको परिवारको बच्चा वा स्वयं क्यान्सरपीडित विद्यार्थीलाई सहयोग गर्दा उसको आत्माबल बलियो हुने मनिषा बताउँछिन् । ‘पीडित व्यक्तिले आफूलाई पनि माया गर्ने व्यक्ति पाउँदा ऊ खुसी हुन्छ । जसका कारण कसैले उसलाई सहयोग गर्यो भने उसको मनोबल बढ्छ’, मनिषाले भनिन् ।









































