काठमाडौं, आइतबार, ११ असोज २०७७ । नेपाली कांग्रेसका वरिष्ठ नेता रामचन्द्र पौडेल नेतृत्वको समूहको विरोधपत्र दर्ता कार्यक्रम तत्कालका लागि स्थगित भएको छ ।
सभापति शेरबहादुर देउवाले पछिल्लो समय गरेका निर्णय सच्याउन माग गर्दै दर्ता गर्ने भनिएको विरोधपत्र दर्ता कार्यक्रम सोमबारसम्मका लागि स्थगित गरिएको हो ।
पौडेल समूहका केन्द्रीय सदस्य नवीनद्रराज जोशीले आइतबारका लागि तय भएको विरोधपत्र दर्ता कार्यक्रम अन्तिम समयमा आएर स्थगित भएको जानकारी दिए । उनले सोमबार दिउँसो १ बजेपछि विरोध पत्र दर्ता गरिने पनि बताए ।
सभापति देउवाले विधान र विधिविपरीत क्रियाशील सदस्यता वितरण, विभाग गठन र विस्तार गरेको आरोप लगाउँदै पछिल्लो समयमा गरिएको निर्णय सच्याउनुपर्ने माग राखेर पौडेल समूहले आइतबार विरोधपत्र दर्ता गर्ने तयारी गरेको थियो ।
पौडेल समूहको शनिबार बसुन्धरामा सम्पन्न गुटको भेलाले सभापति देउवलाई पछिल्ला निर्णयहरु सच्याउनका लागि दबाब दिन हस्ताक्षरसहितको विरोधपत्र बुझाउने निष्कर्ष निकालेको थियो ।








































