नवीन शर्मा
लम्पसार परेर म
अनि म सँगसँगै तिमी ।
मौरिले फुललाई समाते जसरी
मेरा हातले तिम्रा हात
अनि मेरा खुट्टाले तिम्रा खुट्टा
कसक्क कसेर
फुल्न मन छ, त्यो फुलबारीमा ।
हावा सँगसँगै
आकाशमा माथि माथी
बेफिक्र उडिरहेको
सिमलको भुवा जसरी
संसारका सबै बाधा बिर्सिएर
उड्न मन छ , त्यो जवानीमा ।
वनमा हराएका मृगका सावकले
एक्कासी आमा भेटाउने बेला
गद् गद खुसिले उफिएँ झैँ
खेल्न मन छ , तिम्रो यौवनसँग
धित मर्ने गरी
दिन मन छ समुद्र भरिको माया
प्रित मर्ने गरी ।
चौतारीमा बर्सौँबाट
बटुवा सिँगौरी खेलिखेली
थाकेको चौपाटो ढुङ्गो जसरी
थकाउन मन छ ।
मेरो जवानी – तिम्रो जवानीसँग ,
तिम्रो जवानी – मेरो जवानीसँग ।
लाज नमानिकन
डर नमानीकन
बिताउन मन छ तिमिसँग
एक जुनेली रात
प्रिय,
आज यतै बसौँ हुन्न र ?
२०७७ साल जेठ ३० गते शुक्रबार









































