गोरखा, ६ जेठ २०७७। लकडाउनका बेला बस चढेर काफल खान गएका ३० जना युवाहरुलाई प्रहरीले पक्राउ गरेको छ ।
सिरानचोक गाउँपालिका ४ छोप्राक मैदान नजिकै पार्किङ गरिराखिएको ना ५ ख ४७६ नम्बरको बस चढेर वडा नम्बर २ थालाजुङको नयाँबजार क्षेत्रमा पुगेका थिए ।
उनीहरु मध्ये २९ जना वडा नम्बर ४ छोप्राक र १ जना वडा नम्बर ५ छोप्राकका स्थानीय बासिन्दा रहेको प्रहरीले जनाएको छ । समातिएका अधिकाशं यातयात क्षेत्रमा काम गर्ने मजदुर रहेका इलाका प्रहरी कार्यालय हर्मीका प्रहरी नायव निरीक्षक इन्द्र थापाले जानकारी दिनुभयो ।
बस चढेर ठूलो संख्यामा मानिसहरु जंगलमा काफल खान गएको सूचनाका आधारमा इलाका प्रहरी कार्यालय हर्मीबाट गएको टोलीले उनीहरुलाई नियन्त्रणमा लिएको हो । उनीहरु सबैलाई इलाका प्रहरी कार्यालय हर्मीमा राखिएको छ ।
सरकारले गरेको लकडाउनको उलंघन गरी बस चलाएर जंगलमा काफल खान गएकाले उनीहरुलाई कानून अनुसार कारवाही गरिने गोरखाका प्रहरी प्रमुख एसपी ओम अधिकारीले जानकारी दिनुभयो ।








































