काठमाडौं प्रहरीले उपत्यकामा शान्ति सुरक्षा कायम गर्न र आपराधिक गतिविधि नियन्त्रण गर्न सक्रियता बढाउँदै १ हजार ९७ जनाको विशेष ‘प्रोफाइल’ तयार पारेको छ। गुण्डागर्दी, लागुऔषध कारोबार र पटक-पटक चोरी जस्ता घटनामा संलग्न व्यक्तिहरूको विवरण समेटेर यो प्रोफाइल तयार पारिएको हो। प्रहरीका अनुसार यसरी प्रोफाइल तयार गर्दा संदिग्धहरूको गतिविधिलाई नजिकबाट निगरानी गर्न सहज हुने र कुनै पनि नयाँ आपराधिक घटना घट्नासाथ उनीहरूलाई तत्काल कानुनी दायरामा ल्याउन मद्दत पुग्नेछ।
यसअघि, जिल्ला प्रहरी परिसर काठमाडौंले ‘सेफ्टी काठमाडौं’ अभियान सञ्चालन गरी एकै दिन १९५ जनालाई नियन्त्रणमा लिएको थियो। उक्त अभियानमा काठमाडौं उपत्यका अपराध अनुसन्धान कार्यालयको टोलीले पनि उल्लेख्य सहयोग गरेको थियो। पक्राउ परेकामध्ये २४ जना भने पुराना र सक्रिय गुण्डागर्दी पृष्ठभूमिका व्यक्ति रहेको एसपी भट्टराईले जानकारी दिएका छन्। उनीहरूविरुद्ध गुण्डागर्दीकै आरोपमा कानुनी मुद्दा चलाइएको छ भने केही व्यक्तिहरू धरौटीमा रिहा भए पनि केही अझै प्रहरी हिरासतमै रहेका छन्। यस कदमले उपत्यकाको सुरक्षा व्यवस्थालाई थप बलियो बनाउने प्रहरीको विश्वास छ।
