ललितपुर, बिहिबार, १८ बैशाख २०७७ । गोदावरी नगरपालिका गोदामचौरमा आकस्मिक “घरदैलो रक्तदान अभियान” सम्पन्न भएको छ । कोरोना भाइरस नियन्त्रणका लागि सरकारले जारी गरेको डकडाउनको समयमा रगत अभाव हुन नदिन ६१ पिन्ट रगत संकलन गरिएको हो ।
आपतकालिन अवस्थालाई मध्यनजर गर्दै मानवीय सहयोगको रुपमा रक्तदानमा सहभागी हुन अपिल गरे अनुसार आज गरिएको आकस्मिक रक्तदान कार्यक्रममा गोदावरी नगरपालिका-१ गोदामचौरमा २३ पिन्ट र गोदावरी नगरपालिका-२ बिशाखुमा ३८ पिन्ट गरी जम्मा ६१ पिन्ट रगत संकलन भएको बेबी राज भण्डारीले जानकारी दिनुभयो ।

सरकारले नै अति आवश्यक बाहेकका शल्यक्रिया अहिले नगर्न निर्देशन दिए पनि नियमित डायलासिस, सुत्केरी र आकस्मिक शल्यक्रिया गर्नुपर्दा रगतको समस्या हुने गरेको हो । सामान्यतया, अरु बेलामा तीन सय ५० देखि चार सय पिन्ट रगत माग हुने गरेकोमा अहिले भने माग घटेको छ । सोही अनुरुप रगत अभाव नहोस् भनेर घरदैलो रक्तदान अभियान संचालन गरिएको आयोजकले जनाएको छ ।

रक्तदान कार्यक्रममा नेपाल रेडक्रस सोसाइटी गोदामचौर शाखा र गोदावरी वडा न २ को आयोजनामा ब्लोदान नेपाल ललितपुर शाखाको सकृयतामा, नेपाल रक्त संचार भक्तपुरको प्राबिधिक सहयोगमा सम्पन्न भएको थियो ।









































