काठमाडौँ, १४ बैशाख २०७७ । महानगरीय प्रहरी परिसर काठमाडौंले पूर्वप्रहरी महानिरीक्षक सर्वेन्द्र खनाल, सांसदद्वय महेश बस्नेत र किसान श्रेष्ठविरूद्ध आएको अपहरण तथा शरिर बन्धकसम्बन्धी जाहेरी लिन अस्वीस्कार गरेको छ ।
सांसद तथा पूर्वस्वास्थ्य राज्यमन्त्री सुरेन्द्र यादवको अपहरण भएको भन्दै जनता समाजवादी पार्टीका शीर्ष नेताहरु पूर्वप्रधानमन्त्री डा। बाबुराम भट्टराई, उपेन्द्र यादव, राजेन्द्र महतो लगायत आइतबार दिउँसो उजुरी दर्ता गर्न महानगरीय प्रहरी परिसर काठमाडौं (टेकु) पुगेका थिए । तर, काठमाडौं प्रहरीले बारदात भएको स्थान (घटनास्थल) महोत्तरीमा भएको भन्दै उजुरी दर्ता गर्न अस्वीकार गरेको हो ।
गत बुधबार सांसद यादवलाई खनाल, बस्नेत र श्रेष्ठले अपहरणको शैलीमा जनकपुरबाट काठमाडौं ल्याइ पुर्याएका थिए । समाजवादी फुटाउने योजनासहित जनकपुरबाट काठमाडौं ल्याइएका सांसद यादवलाई बुधबार राति मेरियट होटलमा राखिएको थियो । तर, बुधबार राति नै समाजवादी पार्टी र राजपा नेपालबीच एकीकरण गरेर जनता समाजवादी पार्टी, नेपाल गठन गरिएको थियो ।








































