चितवन, ७ चैत २०७६ । चितवनमा कोरोना विशेष (अस्थायी) अस्पतालको स्थापना गरिएको छ । विश्वभर माहामारीको रुपमा फैलिएको कोरोना भाइरसको संक्रमणबाट जोगिन भरतपुर महानगरपालिकाले भरतपुरको प्रदर्शनी केन्द्रमा कोरोना विशेष अस्पतालको स्थापना गरेको हो ।
७२ घण्टामा तयार गरिएको ५० शैया सहितको जनरल वार्डको आज एक कार्यक्रमकाबीच वागमती प्रदेशका सामाजिक विकास मन्त्री युवराज दुलालले र भरतपुर महानगरपालिकाकी प्रमुख रेनु दाहाललाई मास्क, चिकित्सकका लागि उपकरणलगायतका सामग्री हस्तान्तरण गरेर सेवा प्रारम्भको सुरुवात गरिएको हो ।
कार्यक्रममा बोल्दै सामाजिक विकास मन्त्री दुलालले कोरोना नियन्त्रणका लागि मानसिक हिसावले मात्र नभई भौतिक हिसावले पनि तयार रहेको बताउनुभएको छ । उहाँले वाग्मती सरकारले कोरोना नियन्त्रणका लागि १३ जिल्लामा ३ सय आईसियू सहित १ हजार बेर्डको अस्पताल तयार गरेको बताउनुभयो । उहाँले नेपालमा भाईरस छिर्न नदिनका लागि सिमा र हवाई क्षेत्रमा कडाई गरिएको बताउनुभयो ।
अस्पतालमा ५० वटा जनरल वार्ड तयार भैईसेको छन् । बाँकी आइसियू र १० वटा एचडियूको बेड जडानको काम भईरहेको भरतपुर महानगरपालिकाकी मेयर रेनु दाहालले बताउनुभयो । अस्पताल सञ्चालन संगै स्वास्थ्यकर्मीको सुरक्षाको ग्यारेन्टी समेत गर्ने मेयर दाहालले बताउनुभएको छ । उहाँले चितवन कोरोनो भाईरसको संक्रमणबाट उच्च जोखिममा रहेकाले आवश्यकता अनुसार सेवा विस्तार समेत गर्ने प्रतिवद्धता जनाउनुभयो । उहाँले कोरोना नियन्त्रणका लागि विकास खर्च कटौति गरेर भएपनि अगाडी बढ्ने बताउनुभयो ।
मंगलबारबाट काम सुरू गरिएकोमा नेपाली सेना, नेपाल प्रहरी, सशस्त्र प्रहरी, चिकित्सक र सर्वसाधरणको टोली समेत गरेर १ सय ५० जनशक्ति खटिएका थिए । अस्पतालको सञ्चालनको जिम्मा भने भरतपुर महानगरपालिकाले लिनेछ । अब कोरोनाको आशंका लागेका यहीँ अस्पतालमा उपचार गरिने डाक्टर भोजराज अधिकारीले जानकारी दिनुभयो ।









































