काठमाडाैं, ४ चैत्र २०७६ । संसारभर फैलिरहेको कोरोना भाइरसविरुद्ध जनचेतना फैलाउन विभिन्न विद्यार्थी संगठनहरुले संयुक्त रुपमा अभियान चलाउने भएका छन् ।
नेपाल विद्यार्थी संघ (नेविसंघ) को अगुवाईमा मंगलबार बसेको संयुक्त विद्यार्थी संगठनहरुको बैठकले कोरोना भाइरसविरुद्ध जनचेतना फैलाउने आ-आफ्ना मातहतका इकाईलाई परिचालन गर्ने निर्णय गरेका हुन् ।
नेविसंघ महामन्त्री बलदेव तिमल्सिनाका अनुसार बैठकले सरकारसँग त्रिभुवन अन्तराष्ट्रिय विमानस्थल बन्द गर्न पनि माग गरेको बताए । बैठकले विमानस्थलसँगै उत्तरी र दक्षिणी सीमानाकाहरुमा मानिसको आवतजावतमासमेत प्रतिबन्ध लगाउन माग गरेको पनि तिमल्सिनाले जानकारी दिए ।
बैठकले सरकारसँग कालोबजारी रोक्न माग गर्दै विद्यार्थी संगठनहरुले संयुक्त रुपमा बजारको अनुगमन गर्ने पनि निर्णय गरेको छ । सरकारसँग एसईई परीक्षा भयरहित वातावरणमा सम्पन्न गर्नका लागि परीक्षा केन्द्रमा चिकित्सकसहितको हेल्थ डेस्क स्थापना गर्न र आइसोलेसन वार्ड स्थापना गर्न पनि माग गरेको छ ।
बैठकमा विमल पोखरेल- अखिल छैटौं, धनसुर शाही- राप्रविसं (संयुक्त) अध्यक्ष, विवेक जि।सी -अखिल छैटौंका केन्द्रीय सदस्य, चिरञ्जीवी नेपाल- अखिल क्रान्तिकारी अध्यक्ष, आलोक रायमाझी- अखिल (क्रान्तिकारी) अध्यक्ष, ऐन महर -अनेरास्ववियू अध्यक्ष, रुपनारायण श्रेष्ठ -समाजवादी विद्यार्थी यूनियन अध्यक्ष, टंकप्रसाद धमला -समाजसेवी विद्यार्थी युनियन उपाध्यक्ष, विश्वास सल्यानी- नेविसंघ छन् ।
त्यसैगरी नेविसंघ महामन्त्री त्रय बलदेव तिमल्सिना, प्रभात कुमार दाहाल दीपक भट्टराई र उर्मिला थपलिया, अनेरास्ववियू केन्द्रीय सदस्य आरती लामिछाने, राप्रविसं (संयुक्त) उपाध्यक्ष युवराज राना, केन्दीय सदस्य शैलेस लामा, राष्ट्रिय विद्यार्थी संघका अध्यक्ष मनिष मिश्र, महासचिव उमेश यादव, राविसंघ रंजित निष्पक्ष- केन्द्रीय महासचिव, चिरञ्जीवी यादव केन्द्रीय अध्यक्ष राविसंघकाे उपस्थिति थियाे ।








































