काठमाडौँ, २६ फागुन २०७६ । नेपाली कांग्रेसका केन्द्रीय सदस्य डा शेखर कोइरालाले पार्टीको १४ औं महाधिवेशनमा कोइराला परिवारबाट एकजना सभापतिको उम्मेद्वार बन्ने बताएका छन् ।
नेपाल प्रेस युनियन सिरहाले आइतबार लहानमा गरेको पत्रकार भेटघाटमा नेता कोइरालाले महामन्त्री शशांक, केन्द्रीय सदस्य सुजाता र आफूमध्ये एक जना सभापतिको उम्मेदवार बन्ने बताएका हुन् ।
‘कांग्रेसको पर्याय कोइराला परिवार नभए पनि कांग्रेसको संगठन सुदृढिकरण र विस्तारमा कोइराला परिवारको महत्वपूर्ण योगदान छ,’ उनले भने, ‘सम्भवतः आउँदो महाधिवेशनमा म, सुजाता र शंशाकमध्ये एक जना सभापतिको उम्मेदवारको रुपमा प्रस्तुत हुनेछौं।’ कांग्रेस नेता कार्यकर्ताले पार्टी कमजोर भएकाले कोइराला परिवारभित्र नेतृत्वको खोजी गरिरहेको उनको भनाई थियो ।
महाधिबेशनको कार्यतालिका सार्वजनिक भइसकेपछि आमन्त्रित केन्द्रीय सदस्य थप्नु र विभाग गठनप्रति असहमति जनाउँदै उनले यसबाट महाधिवेशनको तयारीलाई अल्मल्याउने प्रयास भएको कोइरालाले बताए ।








































