काठमाडौं, १३ फागुन २०७६ । नेपाल कम्युनिष्ट पार्टी (नेकपा) अध्यक्ष तथा प्रधानमन्त्री केपी शर्मा ओली नेतृत्वको सरकार पार्टीभित्र र बाहिर आलोचित बन्दै आएको छ । सरकारले गतिकासाथ काम गर्न नसकेको भन्दै ओलोचित बन्ने क्रम बढ्दै गएपछि ओली मन्त्रीमण्डलको पुनर्गठनको तयारीमा जुटेको प्रधानमन्त्री सचिवालय स्रोतले जानकारी दिएको छ ।
सरकार गठन भएको दुई वर्षपछि प्रधानमन्त्री ओलीले काम नगर्ने मन्त्रीलाई हेरफेर गर्ने भन्दै पुनर्गठन तयारीमा जुटेको बताइएको छ । केही दिन अघिमात्र ओलीका विश्वासिला पात्र मानिने सञ्चार तथा सूचना प्रविधिमन्त्री गोकुल बाँस्कोटा अडियो प्रकरणमा मुच्छिएर राजीनामा दिएपछि संकट आइपरेको छ ।
बाँस्कोटा प्रककण मात्र होइन । विभिन्न काण्डका कारण ओली नेतृत्वको सरकार अहिले विवादको घेरामा परेको छ । सरकारका प्रवक्ता समेत रहेका बाँस्कोटाको मन्त्रालयको जिम्मा अहिले अर्थमन्त्री डा। युवराज खतिवडालाई र रिक्त रहेको शहरी विकास मन्त्रालयको जिम्मेवारी भौतिक पूर्वाधार तथा यातायातमन्त्री बसन्त नेम्वाङलाई दिएका छन् । २५ सदस्यीय ओली नेतृत्वको मन्त्रिमण्डलमा हाल दुई मन्त्रालयमा मन्त्री रिक्त छन् ।
रिक्त रहेका मन्त्रालयमा नयाँ मन्त्रीको जिम्मेवारी दिन, काम नगर्ने मन्त्रीलाई फेर्न र सरकारको काम सशक्त बनाउने योजनामा पुनर्गठन हुन लागेको छ । ओली नेतृत्वको सरकार २०७४ फागुन ३ गते गठन भएको थियो ।
त्यसपछि निरन्तर २०७४ फागुन १४, चैत्र २, २०७५ जेठ १८ गते, २०७५ साउन १४ गते, २०७५ फागुन १६ गते, २०७६ साउन १५ गते, २०७६ मंसिर ४ गते, २०७६ फागुन ५ र २०७६ फागुन ८ गते हेरफेर, पुनर्गठन थपघट हुँदै आएको थियो ।
यसरी हेरफेर, पुनर्गठन, थपघट हुँदै दुई वर्षको अवधिमा मन्त्रीहरुका अनुसार प्रतिबद्धताअनुसार नभएको बहस छ । ओली पछिल्लो पटक केही मन्त्रीहरूलाई हटाएर नयाँ मन्त्री बनाउने विषयमा परामर्श लिन थालेको स्रोतको भनाइ छ ।
बहुमतको नेकपा सरकारको नेतृत्व गरिरहेका ओलीले जनताका जनजीविकासँग जोडिएका सवालमा काम नभएको भन्दै पार्टीभित्र र बाहिर चर्को आलोचना हुँदै आएको छ । गत मंसिर २९ गतेदेखि पुस ६ गतेसम्म बसेको स्थायी कमिटी र माघ १५ गतेदेखि २० गतेसम्म बसेको दोस्रो केन्द्रीय कमिटीको बैठकमा ओली नेतृत्वको सरकारको चर्को आलोचना भएको थियो ।
समाजवादी पार्टी नेपाल सरकारबाट बाहिरिएपछि ओली सरकार दुईतिहाइबाट बहुमतमा सीमित भएको छ । मधेसवादी दल समाजवादी बाहिरिएपछि सरकारमा अर्को मधेसवादी दल राष्ट्रिय जनता पार्टी (राजपा)लाई पनि सरकारमा ल्याएर दुईतिहाइ पुर्याउनुपर्ने बाध्यताको घेरामा छ ।
सरकारका कामलाई प्रभावकारी बनाउन र राजपालाई सरकार ल्याउने सवालमा नेकपा सचिवालयमा पटकपटक छलफल हुँदै आएको सचिवालय स्रोतले बताएको छ । ओली आफैँले पनि राजपाका शीर्ष नेताहरुसँग पटकपटक छलफल गरिरहेका छन् ।
प्रधानमन्त्री निकट एक सचिवालय सदस्यका अनुसार, ओलीले यही फागुनभित्र नै मन्त्रिमण्डलको पुनर्गठन गर्ने तयारी गरेका छन् । आगामी फागुन २० गतेबाट अर्थमन्त्री डा। युवराज खतिवडाको मन्त्री पद रिक्त हुँदैछ ।
गोकुल बाँस्कोटा र परराष्ट्रमन्त्री प्रदीप ज्ञवाली जस्तै डा। खतिवडा प्रधानमन्त्रीका विश्वासिला पात्र हुन् । नेकपा सचिवालयमा अहिले कार्यकारी अध्यक्ष पुष्पकमल दाहाल प्रचण्ड र बरिष्ठ नेता माधवकुमार नेपाल समूह अर्थमन्त्री खतिवडालाई निरन्तरता दिने पक्षमा छैन्न ।
ओली सचिवालयमा अल्पमत परेका छन् । प्रचण्ड–माधव समूहको चाहना फागुन २० पछि निर्वाचित सांसद सुरेन्द्र पाण्डेलाई अर्थमन्त्री बनाउने पक्षमा छन् । अहिले ओली नरम करम मिलाएर पुनर्गठन गर्न शीर्ष नेताहरु गोप्य रुपमा छलफल गर्न थालेको नेकपा स्रोतको भनाइ छ ।
स्रोतका अनुसार, यही फागुनभित्र नै मन्त्रिमण्डल हेरफेर गरेर प्रधानमन्त्री ओली त्रिवि शिक्षण अस्पताल महाराजगन्जमा किड्नी ट्रान्सप्लान्ट गर्ने तयारीमा छन् । किड्नी ट्रान्सप्लान्ट गर्नुअघि नै ओली आफु निकट र विश्वासिलो मन्त्रीमण्डल बनाउने तयारीमा पार्टीका शीर्ष नेताहरु र आफु निकट नेताहरुसँग छलफलमा जुटेको बताइएको छ ।
तर, नेकपाका प्रवक्ता नारायणकाजी श्रेष्ठले मन्त्रीमण्डल पुनर्गठनको बारेमा आफुलाई जानकारी नभएको बताउँछन् । यसैगरी सचिवालय सदस्य झलनाथ खनालले नेकपाको शीर्ष नेताहरुमा संविधान संशोधनको छलफल सुरु भएपछि मन्त्रीमण्डलको पुनर्गठनको चर्चा नभएको बताए ।
यद्यपि श्रेष्ठ र खनाल मन्त्रीपुनर्गठन बारेमा नेकपा छलफल चलेपछि सार्वजनिक गर्न चाहेका छैनन् । नेकपाले अर्का सचिवालय सदस्य माधवकुमार नेपालको संयोकत्वमा सुवास नेम्वाङ र खिमलाल देवकोटा रहेको संविधान संशोधन गर्न अध्ययन कार्यदल गठन समेत गर्न लागेकोमा बीचमै तुहिएको छ ।








































