पोखरा, १२ माघ २०७६ । मिस नेवा पोखरा ११०४ को आइतबारको अडिसनबाट २५ प्रतिश्पर्धी छानिएका छन् ।
नेवा खल कास्कीले आयोजना गरेको प्रतियोगितामा नेवारी सम’दायका १६ देखि २३ वर्षका युवतीले भाग लिएका छन् । आइतबार छानिएका प्रतिस्पर्धालाई २८ दिन तालिम दिइने प्रतियोगिता संयोजक विमल श्रेष्ठले बताउनु भयो ।
प्रतियोगीलाई नेवारी भाषा, सांस्कृतिक नाच, संगीत, नेवारी सभ्यताका साथै व्यक्तित्व र नेतृत्व विकासबारे सहजीकरण गरिनेछ । नेवा खल कास्कीका अध्यक्ष अशोक पालिखेले यस प्रकारको प्रतियोगिता सुन्दरी प्रतियोगिता नभई भाषा, संस्कृति जोगाउने अभियान भएको दाबी गर्नुभयो । ‘विश्वव्यापीकरण र प्रविधिको विकाससँगै हाम्रो संस्कार, संस्कृतिमा पनि केही चुनौती थपिएका छन् तर हामीले हाम्रो संस्कार भावी पुस्तालाई हस्तान्तरण गर्नुपर्छ’, भन्नुभयो ।
मिस नेवा ११४० को उद्घाटन माघ १६ गते हुनेछ भने १७ गतेबाट तालिम सुरु हुनेछ । प्रतियोगितामा प्रथम, दृतीय र तृतीय हुनेले क्रमश ४०, २५ र १५ हजार नगदसहित प्रमाणपत्र र उपहारले सम्मानित गरिने आयोजकले जानकारी दिएको छ ।
प्रतियोगितामा विभिन्न टाइटल विजेतालाई पनि पुरस्कारको व्यवस्था गरिएको छ । उत्कृष्ट नेवारी भाषा ७ हजार, भ्युअर्स च्वाइस, मस्ट ट्यालेन्ट, बेस्ट पर्सनालिटी, बेस्ट फे्रन्डली, बेस्ट स्माइल र फोटोजेनिकलाई समान ५ हजार र प्रमाणपत्र प्रदान गरिने आयोजकले जनाएको छ । प्रतियोगिताको फाइनल चैत ८ गते पोखरा सभागृहमा हुनेछ ।








































