काठमाडौं, ११ माघ २०७६ । नेपालमा पनि ‘कोरोनाभाइरस’ संक्रमित भएको पुष्टि भएको छ ।
शुक्रबार राजधानीमा पत्रकार सम्मेलन गर्दै स्वास्थ्य मन्त्रालयले चीनबाट फर्किएकी एकजना नेपाली विद्यार्थी कोरोनाभाइरस संक्रमति भएको पाइएको जानकारी दिएको छ ।
वुहानबाट फर्किएकी उनको टेकुमा स्वास्थ्य परीक्षण गरिएको थियो । शंकास्पद देखिएको उनको रगत ‘रिपोर्ट’लाई हङकङ पठाइएको र हङकङबाट कोरोनाभाइरस पुष्टि भएको मन्त्रालयले जनाएको हो ।
कोरोना भाइरस संक्रमण भएकी ती विरामी धनुषाका भएको जानकारी दिइएको थियो । कोरोनाको संक्रमण भएका विरामीलाई अहिले चिकित्सकको उच्च निगरानीमा राखेर उपचार गरिँदैछ।
शुक्रवार पनि अन्य तीनजना शंकास्पद बिरामी टेकु अस्पताल पुगेका छन्। कोरोना भाइरसको संक्रमण रोक्न सरकारले चीनसहितका चार मुलुकबाट आउने पर्यटकलाई उच्च निगरानीमा राखेको बताइएको छ ।
चिनको बुहान प्रान्तबाट देखा परेको कोरोनाभाइरसको संक्रमणले अहिलेसम्म २६ जनाको मुत्यु भईसकेको छ । यसको संक्रमण अहिलेसम्म ८३० जनामा देखिएको छ ।









































