काठमाडौँ, १९ कात्तिक २०७६ । राष्ट्रपति विद्यादेवी भण्डारीले सातै प्रदेशका प्रमुख नियुक्ति गरेकी छिन् ।
राष्ट्रपति भण्डारीले मन्त्रिपरिषद्काे सिफारिसमा सोमनाथ अधिकारी प्यासीलाई प्रदेश-१, तिलक परियारलाई प्रदेश-२, विष्णु प्रसाईं प्रदेश-३ को प्रमुखमा नियुक्त गरेको राष्ट्रपति कार्यालयद्वारा जारी विज्ञप्तिमा उल्लेख छ ।
त्यस्तै गण्डकी प्रदेशमा अमिक शेरचन, प्रदेश-५ मा धर्मनाथ यादव, कर्णालीमा गोविन्द कलौनी र प्रदेश ७ मा शर्मिला त्रिपाठीलाइ नियुक्त गरिएकाे राष्ट्रपति कार्यालयका प्रवक्ता हरिप्रसाद दाहालले जनाएका छन् ।
यसअघि राष्ट्रपति विद्यादेवी भण्डारीले मन्त्रिपरिषद्को सिफारिसमा तत्कालिन प्रधानमन्त्री शेर बहादुर देउवा सरकारले नियुक्त गरेको सातै प्रदेशका प्रदेश प्रमुखलाई आइतबार पदमुक्त गरेकी थिइन् ।
सोमबार बसेको मन्त्रिपरिषदको बैठकले सातै प्रदेशका लागि प्रदेश प्रमुख सिफारिस गरेको थियाे । सत्तारुढ दल नेपाल कम्युनिस्ट पार्टी (नेकपा)को सचिवालय बैठकले सिफारिस गरेका सात जनालाई नै सरकारले अनुमोदन गरेको हो ।









































