काठमाडौं, ५ साउन २०७६ । नेत्रविक्रम चन्द विप्लव’ नेतृत्वको नेकपाका काठमाडौं उपत्यका व्युरो इन्चार्ज माइला लामा पक्राउ परेका छन् ।
लामालाई प्रहरीले काठमाडौंको काँडाघारीबाट शनिबार मध्यराति १२ बजेर २० मिनेटको समयमा पक्राउ गरेको हो ।
महानगरीय अपराध महाशाखाका प्रमुख सहकुल थापाका अनुसार प्रहरीले लामासँगै रेशम तामाङ पनि पक्राउ परेका छन् । प्रहरीले पनि माइला लामालाई पक्राउ गर्न धेरै पहिलेदेखि नै लागिपरेको थियो । लामा विप्लव नेतृत्वको नेकपाभित्र एक प्रभावशाली नेताको रुपमा स्थापित छन् ।
यसअघि नै गृहहमन्त्री रामबहादुर थापा बादलले नेकपा विप्लव समूहका उपत्यका इञ्चार्ज माइला लामालाई पक्राउ गर्न ठाडो आदेश दिएका थिए ।
तत्कालीन माओवादीको जनसाँस्कृतिक महासंघको अध्यक्षसमेत रहेका लामा २०६४ सालको पहिलो संविधानसभामा काठमाडौंबाट चुनाव लडेका थिए । उनि चुनावमा भने सफल भएनन् । लामा पार्टी बिभाजनपछि मोहन वैद्य हुँदै विप्लव नेतृत्वको नेकपामा लागेका थिए ।
काँडाघारीबाट पक्राउ परेका लामाको साथबाट प्रहरीले पार्टीको दस्तावेज र चारवटा मोबाइल सेट बरामद गरिएको प्रहरीले जनाएको छ ।
प्रहरीले माइला लामा काठमाडौंका विभिन्न स्थानमा भएको बम विस्फोटमा संलग्न भएको हुनसक्ने अनुमान गरेको छ ।








































