राष्ट्रपति रामचन्द्र पौडेलले अबको समय आर्थिक विकास र समृद्धिमा केन्द्रित गर्नुपर्ने बताएका छन् ।
नेपाल प्रजातन्त्र सेनानी सङ्घका पदाधिकारीहरूसँगको भेटमा राष्ट्रपति पौडेलले आर्थिक विकास र समृद्धिमा केन्द्रित गर्न राजनीतिक स्थायित्व र सुशासन पहिलो सर्त भएको बताए ।
भ्रष्टाचारको अन्त्य गरी सुशासनका माध्यमबाट मुलुकको विकास गर्ने र सङ्घीय लोकतान्त्रिक गणतन्त्रलाई सुदृढ गर्नुपर्ने आजको आवश्यकता रहेको उनले बताए । युवा पुस्ताको चाहना पनि यही भएको राष्ट्रपति पौडेलको भनाइ छ ।
आगामी फागुन २१ गतेका लागि तय भएको प्रतिनिधिसभा सदस्यको निर्वाचनलाई निर्वाध सम्पन्न गरी अहिलेको अवस्थालाई सहज निकास दिन आवश्यक रहेको उनले स्पष्ट पारे ।
उनले राजनीतिक परिवर्तनपछिको जनचाहना भनेको शान्ति, स्थायित्व र विकास भएको बताउँदै सामाजिक न्यायसहितको समयानुकूल आर्थिक नीति र कार्यक्रम बनाएर मुलुकको आर्थिक विकासको सपना साकार पार्नु मूल दायित्व भएको बताए








































