नेपाली सौन्दर्य प्रतियोगिताको क्षेत्रमा एक महत्वपूर्ण स्थान ओगट्दै आएको मिस ग्रान्ड नेपालले २०२५ को संस्करणका लागि औपचारिक सुरुवात गरेको छ। एक भव्य कार्यक्रमका बीच, आर.के. इन्टरटेन्मेन्ट ग्रुपले देशभरबाट चयन गरिएका २० जना प्रतिस्पर्धीहरूलाई विशेष स्ल्यास वितरण गर्दै उनीहरूलाई प्रतियोगितामा स्वागत गर्यो। यो कार्यक्रम केवल ताज जित्ने होड मात्र नभएर, नेपाली युवतीहरूलाई अन्तर्राष्ट्रिय मञ्चसम्म पुर्याउने अवसरको ढोका पनि हो।
प्रतियोगितामा सहभागी भएका युवतीहरू नेपालको विभिन्न भूभागबाट आएका छन्। काठमाडौंदेखि झापा, पोखरादेखि वीरगन्ज, नेपालगन्ज, बुटवल, चितवन, धरान, सिन्धुपाल्चोक, रामेछाप, खोटाङ र सुनसरीसम्म, यी अनुहारहरूले देशको विविधता र सुन्दरतालाई प्रतिनिधित्व गर्छन्। उनीहरूमा आत्मविश्वास, वक्तृत्व कला, र सौन्दर्यको अद्वितीय मेल देखिन्छ, जुन अन्तर्राष्ट्रिय मञ्चमा नेपालले आफ्नो उपस्थिति जनाउन सक्षम बनाउने संकेत हो।

यस वर्षको प्रतियोगिता अझ व्यवस्थित र व्यावसायिक बनाइएको छ। अन्तर्राष्ट्रिय ख्याती प्राप्त कोरियोग्राफर रोजिन शाक्यले ग्रुमिङ सेसन सञ्चालन गरिरहेका छन्, जसअन्तर्गत व्यक्तित्व विकास, प्रस्तुतिकरण कला र रंगमञ्चमा आत्मविश्वाससहित उभिनेसम्मको प्रशिक्षण प्रदान गरिन्छ। प्रतियोगीहरूको तयारीलाई थप निखार दिन सन्दिप पण्डितको फोटोग्राफी, रोजिना सुवालको मेकअप, नविन लुइटेलको ड्रेस डिजाइन र आर.के. ग्रुपको भिडियो टिमले महत्वपूर्ण भूमिका खेल्नेछन्।
मिस ग्रान्ड नेपाल २०२५ की विजेताले केबल ताज मात्र होइन, प्रतिष्ठा र जिम्मेवारी पनि हात पार्नेछिन्। उनलाई नगद पुरस्कार, इभी स्कूटर, गुडविल एम्बेसडरको मान्यता र नेपाली चलचित्रमा अभिनय गर्ने अवसर प्राप्त हुनेछ। त्यससँगै, उनले अन्तर्राष्ट्रिय सौन्दर्य प्रतियोगितामा नेपालको झन्डा फहराउँदै देशलाई विश्वमञ्चमा चिनाउने जिम्मेवारी पनि उठाउनेछिन्।
प्रतियोगीहरूलाई ३५ दिनसम्म चल्ने विशेष प्रशिक्षणमा समावेश गरिनेछ, जहाँ उनीहरूको सम्पूर्ण क्षमता अभिवृद्धि गरिनेछ। अन्ततः, साउन महिनाको अन्त्यतिर आयोजना हुने ग्रान्ड फिनालेमार्फत नयाँ मिस ग्रान्ड नेपालको घोषणा गरिनेछ। यो फिनाले केवल एक प्रतियोगिता नहुनेछ, यो हुनेछ नेपाली नारीको आत्मविश्वास, प्रतिभा र सम्भावनाको उत्सव।








































