काठमाडौँ, २७ बैशाख २०७६ । विश्व फिल्मका लागि दोस्रो ठुलो बजार मानिएको चीनमा हलिउडदेखि बलिउडसम्मका फिल्महरुको पहुँच निकै छ । पछिल्लो समय त बलिउडका फिल्महरुले चीनमा नयाँ नयाँ रेकर्ड नै राख्ने गरेको छ तर नेपाली फिल्महरुले भने विश्व बजार नपाईरहेको अवस्था छ ।
यसबीचमा चीनमा पनि अब नेपाली फिल्म रिलिज हुने भएको छ । यसैबर्ष देखि वर्षेनी एउटा नेपाली फिल्म चाईनीज भाषामा डबिङ गरेर रिलिज गरिने भएको हो ।
नेपाली फिल्म चिनियाँ दुतावास र चिनियाँ चलचित्र विकास बोर्डसँगको सहकार्यमा वर्ल्ड कल्चरल नेटले रिलिज गर्न लागेको हो । तर हालसम्म यस बर्ष कुन फिल्म रिलिज हुन्छ भनेर तय भने गरिएको छैन । उक्त फिल्मको घोषणाआगामी साता हुनेछ । फिल्म छानेर पठाउने जिम्मा पनि नेटले नै पाएको छ ।
नेपाली फिल्म चिनियाँ भाषा र चिनियाँ फिल्म नेपाली भाषामा डब गरेर रिलिज गर्न लागिएको हो । नेपाली भाषामा डब गरिएको चिनियाँ फिल्म काठमाडौंमा हुने फेस्टिवलमा समेत देखाईने छ ।








































