हलिउडका महान् फ्रान्सिस फोर्ड कोपोलाको फिल्म ‘मेगालोपोलिस’को वर्ल्ड प्रिमियर आज प्रसिद्ध कान्स फेस्टिभलमा हुँदैछ । यो फिल्मको रेडकार्पेट प्रिमियरमा काठमाडौं महानगरपालिकाका मेयर बालेन्द्र शाह (बालेन)ले सहभागिता जनाउने तय भएको छ ।
नेपाली समयानुसार राति १० बजे हुने वर्ल्ड प्रिमियरमा मेयर शाहले भाग लिने उनका व्यवस्थापन सल्लाहकार कुमार व्यञ्जनकारले जनाए । ‘भीभीआईपीको लागि मेगोलोपोलिसको प्रिमियर तय गरिएको छ,’ व्यञ्जनकारले भने ।
रेडकार्पेट प्रिमियरअघि कान्स सहरका समकक्षी डेभिड लिसनार्डसँग उनकै कार्यालयमा मेयर शाहको भेटवार्ता कार्यक्रम रहेको जनाइएको छ ।
‘मेगालोपोलिस’ यस वर्षको प्रतीक्षित हलिउड फिल्म हो । रेडकार्पेटमा निर्देशक कोपोलासहित स्टारहरु एडम ड्राइवर, नाताली इमानुएल पनि सहभागी हुने अन्तर्राष्ट्रिय सञ्चारमाध्यमले जनाएका छन् ।
साइन्स फिक्सन-ड्रामा ‘मेगालोपोलिस’बाट निर्देशक कोपोला १३ वर्षपछि पुनरागमन गर्दैछन् । पाँच पटक ओस्कार र ६ पटक गोल्डेन ग्लोब्स जितेका कोपोला महान् कालजयी फिल्म ‘गडफादर’ निर्देशकको रुपमा चर्चित छन् । यो फिल्मले विश्व फिल्म निर्माणमा ग्याङस्टर जनराको रुपमा क्रान्ति ल्यायो ।








































