राष्ट्रियसभा सदस्य वामदेव गौतमले नेपाललाई १० वर्षमा युरोपियन स्तरको विकास गर्न सकिने दाबी गरेका छन् । त्यसका लागि नेपालको स्रोतले पर्याप्त रहेको र सीप मात्र बाहिरबाट ल्याए पुग्ने उनको दाबी छ ।
आइतबार बसेको राष्ट्रियसभा बैठकको विशेष समयमा गौतमले नेपाललाई युरोपेली मापदण्डमा पुर्याउन एउटै शर्त अहिले चलिरहेको खिचडी राजनीति अन्त्य गर्नुपर्ने बताएका हुन् ।
‘समृद्ध समाजवाद निर्माण गर्न सकिन्छ, फेरि पनि ग्यारेन्टी पेश गर्छु । हामीले चाहने हो भने १४ सय खर्ब नेपाली रुपैयाँ छ, निकाल्न सकिन्छ, प्रयोग गर्न र समाजवाद निर्माण गर्न सकिन्छ,’ गौतमले भने, ‘१० वर्षमा नेपाल युरोपियन स्ट्यान्डरमा प्रवेश गर्न सक्छ, यसका लागि लगानी पुग्छ, प्रविधि ल्याउन सकिन्छ । देश विकासका लागि चाहिने स्रोत, साधन जुटाउन सकिन्छ । उपरोक्त अवस्थाका लागि खिचडी राजनीति अन्त्य गर्नुपर्छ ।’
खिचडी राजनीति भनेर कांग्रेस र एमाले गठबन्धनतर्फ संकेत गर्दै गौतमले नेपालको अबको गन्तव्य समृद्ध समाजवाद हुनुपर्ने धारणा राखे ।
‘पुँजीवादले समाजवाद जन्माउँछ, नेपालमा पुँजीवाद आएर समृद्ध भएको छ, यहाँभन्दा अगाडि जान सक्दैन,’ गौतमले भने ।








































