काठमाडौँ, शनिबार, ७ फागुन २०७८ । नेपाल कम्युनिस्ट पार्टी (एकीकृत समाजवादी) ले अमेरिकी सहयोग परियोजना एमसीसी सम्झौतालाई संसद्मा टेबल गर्न दिने भएकाे छ । आज शनिबार नयाँ बानेश्वरमा बसेको स्थायी कमिटी बैठकले एमसीसी सम्झौतालाई संसद्मा टेबल गर्नबाट नरोक्ने निर्णय गरेको हाे ।
प्रवक्ता जगनाथ खतिवडाका अनुसार बैठकले एमसीसी सम्झौतालाई यथास्थितीमा पारित गर्न नसकिने तर संसद्मा छलफलका लागि टेबुल गर्न दिने निर्णय गरेको हो । प्रमुख प्रतिपक्षी नेकपा एमाले र सत्तारुढ नेपाली कांग्रेसबीचको सम्भावित वैकल्पिक गठबन्धनको बन्ने जोखिम भएपछि यसअघि विराेध गर्दै आएकाे एकीकृत समाजवादी मझधारको बाटो अपनाउँदै एमसीसी टेबुल गर्न दिने निर्णयमा पुगेको बुझिएकाे छ ।
एमसिसीले दिएको समयसीमा सकिन केही दिन मात्र बाँकी रहँदा प्रधानमन्त्री शेरबहादुर देउवा तीव्र दबाबमा छन् । सत्ता गठबन्धनका माओवादी केन्द्रले अहिलेकाे अवस्थामा एमसीसी अगाडि बढाइए सरकार छाड्ने चेतावनी दिइसकेकाे छ । गठबन्धनकै जनता समाजवादी पार्टी भने ठोस निर्णय लिन सकेको छैन ।
अध्यक्ष उपेन्द्र यादव अन्य दलहरूको निर्णय कुरिरहेका छन् भने संघीय परिषद् अध्यक्ष बाबुराम भट्टराई पास गर्नुपर्ने पक्षमा छन् । यसअघि नै एमसिसीको विरोध गरेको गठबन्धनको राष्ट्रिय जनमोर्चा भने सडक आन्दोलनमा छ ।








































