काठमाडौं, बिहिबार, २० भाद्र २०७८ । निर्वाचन आयोगले लोकतान्त्रिक समाजवादी पार्टी नेपाल (लोसपा) लाई राजनीतिक दलको मान्यता दिएको छ ।
बुधबार आयोगमा पुगी १४ जना सांसदले नयाँ दल दर्ताका लागि गरेको हस्ताक्षर सनाखत भएपछि आयोगले लोसपालाई छुट्टै दलको रुपमा दर्ता गरेको हो । सरकारले जारी गरेको राजनीतिक दल सम्बन्धी अध्यादेशको सुविधा प्रयोग गरेर महन्थ ठाकुरले नयाँ दल गठन गरेका हुन् । आयोगमा लोसपाको दर्ता नम्बर १६७ रहेको छ ।
लोसपालाई राजनीतिक दल सम्बन्धी ऐन, २०७३ (दोस्रो संशोधन अध्यादेश, २०७८) को दफा ३३ बमोजिम दर्ता गरेर प्रमाण दिएको आयोगले जनाएको छ । आयोगका प्रवक्ता राजकुमार श्रेष्ठले सनाखतपछि दल दर्ता गरेर प्रमाणपत्र दिएको जानकारी दिए ।
ठाकुरको पार्टीको केन्द्रीय कार्यालय बबरमहल तोकिएको छ ।
सरकारले ल्याएको २० प्रतिशत केन्द्रीय सदस्य वा सांसद पुर्याएर दल विभाजन गर्नसकिने अध्यादेशअन्तर्गत जसपा फुटेर लोसपा दर्ता भएको हो ।
लोसपाको पक्षमा महन्थ ठाकुर, राजेन्द्र महतो, शरतसिंह भण्डारी, अनिलकुमार झा, दुलारीदेवी खँग खत्वे, कल्लुदेवी विश्वकर्मा, शेखरकुमार सिंह,लक्ष्मणलाल कर्ण, चन्दा चौधरी, निर्जला राउत, विमलप्रसाद श्रीवास्तव, उमाशंकर अरगरिया, एकवाल मियाँ र चन्द्रकान्त चौधरीले सनाखत गरेका छन् ।









































