काठमाडौं, शनिबार, ५ भाद्र २०७८ । मुम्बईमा उपचाररत नेपाली कांग्रेस नेता प्रदीप गिरिलाई भेट्नका लागि कांग्रेसका उपसभापति विमलेन्द्र निधि मुम्बई पुग्नुभएको छ । उहाँले शुक्रबार भेटका क्रममा निधिले गिरिको स्वास्थ्य अवस्थाबारे जानकारी लिनुभएको हो ।
उपसभापति निधिले गिरिको स्वास्थ्य अवस्था खतरामुक्त रहेको बताउनुभएको छ । ‘उहाँको घाँटीको देब्रेपट्टिको नलीमा सानो ट्युमर देखिएको छ । ट्युमरबारे सम्पूर्ण रिपोर्ट आइसकेको छैन । अहिले उहाँ सामान्य हुनुहुन्छ र स्वास्थ्यमा खतरा छैन’, निधिले भन्नुभयो । भेटका क्रममा गिरिले आफूले नियमित स्वास्थ्य परीक्षण गराइरहेको र अहिले घाँटीको ट्युमरमा केन्द्रित रहेर फलोअप गरिरहेको निधिलाई भन्नुभएको थियो ।
गिरिको मुम्बईस्थित हिन्दुजा अस्पतालमा डा. सुल्तान प्रधान नेतृत्वको चिकित्सक टिमले उपचार गरिरहेको छ । भेटमा प्रदेश २ का ऊर्जामन्त्री ओमप्रकाश शर्मा र नेपाली जनसम्पर्क समिति भारतका अध्यक्ष बालकृष्ण पाण्डेलगायत उपस्थित हुनुहुन्थ्यो ।
ट्युमर अन्त कतै नफैलिएकाले चिन्ता गर्नुपर्ने अवस्था नरहेको अस्पतालले जनाएको छ । चिकित्सकहरूले अन्य स्वास्थ्य परीक्षण पनि गरिरहेकाले रिपोर्ट हेरेर थप उपचार गरिने बताइएको छ । स्वास्थ्यमा समस्या देखिएपछि कांग्रेस नेता गिरि एक साताअघि उपचारका लागि मुम्बई जानुभएको थियो ।









































