काठमाडौं, ३ साउन २०७८ । प्रधानमन्त्री शेरबहादुर देउवाले संसद्मा विश्वासको मत पाउने लगभग निश्चित भएको छ । जसपाको महन्थ ठाकुर पक्षले पनि मत दिने निर्णय गरेपछि देउवा सरकार जोगिने निश्चित भएको हो ।
आइतबार साँझ बसेको ठाकुर पक्षको बैठकले आफूहरूको उठाएका राजनीतिक माग पूरा गर्ने प्रतिबद्धताको आश्वासन पाएपछि मत दिने भएको हो । ठाकुर पक्षमा १३ सांसद रहेका छन् ।
यसअघि उपेन्द्र यादव पक्ष, माओवादी केन्द्रले देउवालाई मत दिने निर्णय गरिसकेको छ । यता, माधव नेपाल पक्षका सांसदले पनि मत दिने सम्भावना रहेको छ ।
कांग्रेसका ६१, माओवादी केन्द्रका ४८, स्वतन्त्र रूपमा निर्वाचित छक्कबहादुर लामा, जसपाका दुवै पक्ष गरी ३४ जनाले देउवालाई मत दिने भएका छन् । माधव पक्षविनै देउवालाई १४४ मत प्राप्त हुने देखिन्छ ।
देउवालाई विश्वासका मतका लागि प्रतिनिधिसभामा तत्काल कायम रहेको १ सय ७१ सांसदमध्ये १ सय ३६ जनाको समर्थन चाहिन्छ । माधव पक्षले पनि मत दिँदा स्पष्ट बहुमत आउने निश्चित भएको छ ।








































