काठमाडौँ, आइतबार, २७ असार २०७८ । सरकारले मेलम्ची–हेलम्बु क्षेत्रका बाढीपीडित नागरिकलाई प्रतिपरिवार ५० हजार रुपैयाँका दरले सहयोग गर्ने भएको छ । हेलम्बु गाउँपालिका र मेलम्ची नगरपालिकाको स्थलगत निरीक्षण गर्दै प्रधानमन्त्री केपी शर्मा ओलीले सम्बन्धित पालिकाहरूलाई राहत कोष तथा सामग्री हस्तान्तरण गरिएको हो ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट ३६६ घरपरिवारलाई ५० हजार रुपैयाँका दरले जम्मा एक करोड ८३ लाख रुपैयाँ सहयोग हस्तान्तरण गरिएको हो । मेलम्ची खानेपानी आयोजनाबाट हेलम्बु गाउँपालिकालाई दुई करोड ५० लाख रुपैयाँ, मेलम्ची नगरपालिकालाई एक करोड ३६ लाख रुपैयाँ, पाँचपोखरी थानपाल गाउँपालिकालाई दुई करोड रुपैयाँ र इन्द्रावती गाउँपालिकालाई १५ लाख रुपैयाँ बराबरको तारजाली हस्तान्तरण गरिएको हो । त्यसै गरी साल्टट्रेडिङ कर्पोरेसन लिमिटेडबाट एक हजार ५०० बण्डल जस्तापाता उपलब्ध गराइएको छ ।
त्यसै गरी निर्माण व्यवसाय प्रवर्द्धन कोषबाट हेलम्बु गाउँपालिकालाई छ लाख रुपैयाँ र मेलम्ची नगरपालिकालाई रु चार लाख सहयोग घोषणा गरिएको छ । प्रधानमन्त्री ओली, भौतिक पूर्वाधार तथा यातायात मन्त्री वसन्तकुमार नेम्वाङ, पूर्वमन्त्री शेरबहादुर तामाङ, सम्बन्धित मन्त्रालयका सचिव तथा प्रतिनिधिसहितको टोलीले स्थलगत अध्ययन गरेको थियो ।









































