काठमाडौँ,२७ जेठ २०७८ । प्रधानमन्त्री केपी शर्मा ओलीले मन्त्रिमण्डल विस्तार गर्ने तयारी गरेका छन् ।
प्रधानमन्त्रीका मुख्य सल्लाहकार विष्णु रिमालका अनुसार ७ मन्त्री र १ राज्यमन्त्रीलाई नियुक्त गरेर मन्त्रिपरिषद्लाई आजै पूर्णता दिन लागिएको हो ।
प्रधानमन्त्रीले बिहीबार विस्तार गर्न लागेको मन्त्रिमण्डलमा कास्कीका एमाले नेता खगराज अधिकारी गृहमन्त्री हुने पक्का भैसकेको छ ।
गृहमन्त्री बन्न लागेका अधिकारीको जन्म विसं २०१८ साल चैत्र २५ गते लेखनाथको बेगनासमा भएको हो ।
अधिकारी विसं २०२९ सालमा स्थानिय आनन्द ज्योति माबिको स्वबियु सभापतिको रूपमा बिद्यार्थी राजनीति हुँदै सक्रिय राजनितिमा होमिएका थिए ।
अधिकारीले बिद्यार्थी राजनितिमा २०३७ सालमा केन्द्रिय स्वबियु सदस्य, २०४०/४१ मा पृथ्वीनारायण क्याम्पस पोखराको स्वबियु सभापति हुँदै अनेरास्ववियु केन्द्रिय कमिटी उपाध्यक्ष सम्मको जिम्मेवारी सम्हालेका थिए ।








































