काठमाडौं, सोमबार, २ चैत्र २०७७ । प्रधानमन्त्री एवं नेकपा अध्यक्ष केपी शर्मा ओलीले फागुन २८ गतेको निर्णय फिर्ता नहुने बताएका छन् ।
सोमबार पार्टी कार्यालय धुम्बाराहीमा वरिष्ठ नेता माधवकुमार नेपाल पक्षले फागुन २८ गते गरेको निर्णय विधानविपरित भएको भन्दै फिर्ता लिन भनेको थियो । त्यसमा ओलीले निर्णय फिर्ता नहुने जवाफ दिएकाे स्रोतले बतायो ।
‘फागुन २८ गतेको निर्णय रद्ध गर्नुपर्छ । २८ गतेको भनिएको निर्णय स्थगित भयो भने हामी राष्ट्रिय भेला स्थगित गर्न तयार छौँ भन्ने धारणा राख्यौँ तर उहाँ तयार हुनुभएन ।’ बैठकपछि पत्रकारहरुसँग कुरा गर्दै नेता भीम रावलले भने । नेपाल पक्षले बैठक विधानअनुसार नभएको भन्दै यसअघि नै अस्विकार गरेको थियो ।
बैठकमा ओलीले यसअघि नेपाल पक्षले बोलाएको राष्ट्रिय कार्यकर्ता भेला स्थगन गर्न आग्रह गरेका थिए ।
२८ गते ओलीले बालुवाटारमा आफू पक्षीय केन्द्रिय समितिको बैठकबाट महाधिवेशन घोषणा, माओवादीका नेताहरूलाई एमाले केन्द्रीय कमिटीमा मनोनयन र नेपाल पक्षका नेताहरुको जिम्मेवारी खोसेका थिए ।








































