काठमाडौं, सोमबार, २ चैत्र २०७७ । राजनीतिक संकट गहिरिँदै गएका बेला आईतबार प्रधानमन्त्री केपी शर्मा ओली र राष्ट्रपति विद्यादेवी भण्डारीबीच करीब डेढ घण्टा भेटवार्ता भएको छ ।
प्रधानमन्त्री ओली आईतबार साँझ ७ बजे राष्ट्रपति भण्डारीलाई भेट्न शितलनिवास पुगेका थिए । ओली करीब साढे ८ बजे शितलनिवासबाट बाहिरिएका स्रोतले जनाएको छ ।
ओली नेतृत्वको सरकार अल्पमतमा पर्न सक्ने र नयाँ सरकारका लागि विभिन्न दलहरूबीच छलफल चलिरहेका बेला उनले राष्ट्रपति भण्डारीलाई भेटेका हुन् ।
नेकपा माओवादी केन्द्रले ओली नेतृत्वको सरकारमा रहेका आफ्ना पार्टीका मन्त्रीहरूलाई फिर्ता बोलाउने निर्णय गरेको छ । सर्वोच्च अदालतको पछिल्लो फैसलाले तत्कालीन एमाले र माओवादी ब्युँतिएपछि नेपाली राजनीतिक वृत्तमा नयाँ सत्ता समीकरणको छलफल चलिरहेको छ ।
यसअघि आफ्नै पार्टीको प्रचण्ड–नेपाल पक्षले हटाउने तयारी गरेको संकेत पाएपछि प्रधानमन्त्री ओलीले प्रतिनिधिसभा विघटन गरी मध्यावधि निर्वाचन घोषणा गरेका थिए । तर निर्वाचनलाई सर्वोच्च अदालतले उल्ट्याइदियो ।
आफ्नै पार्टीभित्रको आन्तरिक किचलोका कारण अप्ठ्यारो पर्दै गएपछि प्रधानमन्त्री ओलीको राष्ट्रपति भण्डारीसँगको नियमित भेटघाट बाक्लिरहेको स्रोतले जनाएको छ ।
नेकपा एमाले अध्यक्ष तथा प्रधानमन्त्री ओलीविरुद्ध माधवकुमार नेपाल र झलनाथ खनाल पक्षले संघर्ष चलाएको छ ।








































