काठमाडौँ, आइतबार, १२ पुस २०७७ । प्रमुख प्रतिपक्षी कांग्रेसका वरिष्ठ नेता रामचन्द्र पौडेलले संविधानले बहुमतको प्रधानमन्त्रीलाई दिँदै नदिएको अधिकार प्रयोग गरी लोकतन्त्रको आत्मामा प्रहार भएको बताउनु भएको छ । साथै, उहाले प्रधानमन्त्री केपी शर्मा ओलीले मन्त्रिपरिषद् हेरफेर गरेर संवैधानिक मर्यादाको उल्लंघन गरेको बताउनु भएको छ ।
प्रधानमन्त्री ओलीले शुक्रबार ८ मन्त्री र एक राज्यमन्त्री थपेका थिए । त्यसको विरोध गर्दै कांग्रेस वरिष्ठ नेता पौडेलले शनिबार विज्ञप्ति जारी गरेर विरोध गरेका छन् ।
‘प्रधानमन्त्री केपी शर्मा ओलीको संविधानवाद र लोकतन्त्र उपर विश्वास रहेको देखिएन । उहाँले हालै लगातार चालेका तीन वटै कदम संविधानको मर्म र भावना विपरीत छन् । अध्यादेशद्वारा संवैधानिक परिषद्को ऐन संशोधन गरेर कार्यकारिणीलाई स्वेच्छाचारी बन्न रोक्नुपर्ने आयोगहरू आफू अनुकूल बनाउने लुकीचोरी काम गर्नुभयो,’ पौडेलले विज्ञप्तिमा भनेका छन्, ।
‘संविधानले बहुमतको प्रधानमन्त्रीलाई दिँदै नदिएको अधिकार प्रयोग गरेर लोकतन्त्रको आत्मामा प्रहार गर्नुभयो । हिजो फेरि कामचलाउ मन्त्रिमण्डल हेरफेर गरेर संवैधानिक मर्यादाको उल्लघन गर्नुभयो ।’
प्रधानमन्त्री ओलीले घोषणा गरेको निर्वाचन हुनेमा पौडेलले आशंका व्यक्त गरेका छन् । प्रधानमन्त्रीका कदमले नै निर्वाचन हुनेमा विश्वास नरहेको भन्दै उनले अदालतबाट आस रहेको उल्लेख गरेका छन् । ‘अब हामीलाई उहाँले देशमा सहिसलामत चुनाव गराउनु हुन्छ भन्ने पनि विश्वास छैन । बरु न्यायमूर्तीहरूबाट असंवैधानिक कदमलाई सच्याइ लोकतन्त्रको जगेर्ना हुनेछ भन्ने विश्वास गर्दछु,’ उनले भनेका छन् ।
संसद विघटन गर्ने प्रधानमन्त्री ओलीको कदमविरुद्ध प्रतिपक्षी कांग्रेसले देशभर जनप्रदर्शन गर्न लागेको भन्दै त्यसमा सहभागिता जनाउन पौडेलले कार्यकर्ताहरूलाई अनुरोध गरेका छन् ।








































