विराटनगर, मंगलबार, २३ भाद्र २०७७ । नेपाली कांग्रेसका वरिष्ठ नेता रामचन्द्र पौडेलले आफू नै बीपी कोइरालाको विरासत थाम्ने दाबी गरेका छन् ।
१०७ औं बीपी जन्म जयन्तीको अवसरमा विराटनगरको साझा सवालका लागि साझा मञ्च विराटनगरले सोमबार वर्तमान सन्दर्भमा प्रजातान्त्रिक समाजवाद विषय विषय भर्चुअल अन्तरक्रियामा नेता पौडेलले आफू पनि कोइराला भएको स्पष्ट गरे । भने,“त्यहि भएर म पनि कोइराला नै हो भनेर केहीअघि मैले विराटनगरबाटै घोषणा गरेको थिएँ ।” नेता पौडेलले बीपीको समाजवादी चिन्तन र सिद्धान्त अहिले पनि उत्तिकै सान्र्दभिक रहेको बताउँदै पार्टीमा बीपीको त्यो विरासत आफूले नै थाम्ने दाबी गरे ।
”म कमजोर पार्टीको बलियो नेता होइन बरु बलियो पार्टीको सामान्य नेता बन्न चाहन्छु,” पौडेलले भने,“कांग्रेसलाई बलियो बनाउनुको विकल्प छैन । भएका कमीकमजोरी सुधार गरेर अघि बढ्नु पर्छ ।” पौडेलले आफूले पहिल्यै महाधिवेशनको विषयलाई टुंगोमा पु¥याउन क्रियाशील सदस्यता जस्ता विषयलाई थाँती नराख्न सुझाव दिएको बताए ।
पौडेलले बीपीको सामान्य जीवनशैली र देशप्रतिको इमान्दारिताले नै आफू प्रजातान्त्रिक आन्दोलनमा लागेको स्पष्ट गरे । भने,“अहिले पनि म प्राजातन्त्रकै आन्दोलनमा छु ।” पौडेलले अहिलेको कम्युनिष्ट सरकार जनताप्रति उत्तरदायी नभएको र गैरजिम्मेवार रुपमा प्रस्तुत भएको बताए ।
कार्यक्रममा मोरङ कांग्रेसका नेता गोपालमान सिंह राजभण्डारीले स्वागत मन्तब्य राख्दै नेताहरु इमान्दार हुनुपर्ने सुझाव दिए । भने,“नेताहरु आफू पनि जनता, कार्यकर्ता र देशप्रति उत्तरदायी हुनुपर्छ । एकथोक भन्ने र अर्को काम गर्ने चरित्र हुनुहुन्न ।” अर्थशास्त्री भेषप्रसाद धमलाले अहिले कोभिडले उत्पन्न गरेको परिस्थितिबाट पार पाउन विश्व नै लागि परेको बेला नेपालमा भने सरकार लाचार जस्तो देखिएको आरोप लगाए ।
मोरङ कांग्रेसका उपसभापति भक्ति माझीले बीपीको सिद्धान्तकै कारण आज पनि कांग्रेसको जीवन रहेको बताए । कार्यक्रमको संयोजन प्रदेश १ का कांग्रेस सचेतक सूयर्माराज राईले गरेका थिए ।








































