गोरखा, बिहिबार, ११ भाद्र २०७७ । गोरखाको शहिदलखन गाउँपालिकाले घरघरै पुगेर जेष्ठ नागरिकको स्वास्थ्य परीक्षण सुरु गरिएको छ । घरघरमा पुगेर स्वास्थ्य परीक्षण गरेको हुनाले जेष्ठ नागरिकहरू खुशि देखिन्छन् । ९ वटै वडाका स्वास्थ्य संस्थामा कार्यरत स्वास्थ्यकर्मी घरघरै पुगेर ७० वर्ष उमेर पुगेकाहरुको स्वास्थ्य जाँच गरिने गाउँपालिका अध्यक्ष रमेश थापाले जानकारी दिनुभयो ।
शहिद लखन गाउँपालिकामा ७० वर्ष उमेरदेखि माथिका करिब दुई हजार पाँच सय जना रहेको गाउँपालिकाले जनाएको छ । वृद्धवृद्धालाई घरघरमा पुगेर स्वास्थ्य सेवा दिने कार्यक्रम गाउँपालिकाले यो वर्षदेखि संचालन गरेको हो ।
साउनदेखि सुरु गर्ने योजना भएपनि कोभिड १९ को प्रभावले एक महिना ढिला भएको उहाँले बताउनु भयो । गाउँपालिकाले दिर्घरोगी वृद्धवृद्धालाई निशुल्क औषधी दिने योजना सहित घरघरमा पुगेर स्वास्थ्य जाँच गर्ने अभियान सुरु गरेको जनाएको छ ।
साथै, यस अभियानले ९ वटै वडाका जेष्ठ नागरिकहरू लाभान्वित हुनेछन् । सहिद लखन गाउँपालिका ७ नम्वर वडाध्यक्ष शरण श्रेष्ठका अनुसार, गाउँगाउँमा स्वास्थ्यकर्मी पुगेर सेवा दिंदा स्थानीयबासी अत्यन्तै खुशी भएको बताउनु भयो ।









































