काठमाडौँ १८ बैशाख २०७७ । नेपाली कांग्रेसका महामन्त्री शशांक कोइरालाले कोरोनाभाइरस संक्रमणबाट जोगिन सचेत रहनुपर्ने बताएका छन् ।
बिहीबार भिडिओ सन्देश जारी गर्दै कोइरालाले कोरोनाबाट बच्न केही सतर्कताका बारेमा जानकारी गराएको उल्लेख गरेका छन् ।
‘सचेत बनौं र स्वस्थ रहौं,’ कोइरालाले भनेका छन् ।
उनले कोरोना रोकथाम तथा नियन्त्रणमा अग्रपंतिमा रहेर काम गरेका स्वास्थ्यकर्मीलाई धन्यवाद दिएका छन्। कोइराला चिकित्सक पनि हुन् ।
कोरोना श्वासप्रश्वासबाट सर्ने रोग भएकोले सामाजिक दूरी कायम गर्न उनले आग्रह गरेका छन् । बन्दाबन्दी खुलेपछि पनि बाहिर जाँदा सामाजिक दूरी कायम गर्नुपर्ने उनले उल्लेख गरेका छन् ।
साबुन पानीले पटकपटक हात धुन, हातले नाक, मुख र आँखा नछुन पनि उनको आग्रह छ। विदेशबाट आएकाहरू क्वारेन्टाइनमा बस्नुपर्ने उनले बताएका छन् ।
उनले मुश्लिम समुदायलाई रमजानको शुभकामना दिएका छन्। घरमै बसेर नमाज पढ्न पनि उनको आग्रह छ ।









































