काठमाण्डौँ, २५ चैत २०७६ । शंकर ग्रुपका मालिक पक्राउ परेका छन् । कोरोना भाइरसको महामारीका बेला मेडिकल सामाग्रीको कालोबजारी गरेको आरोपमा शंकर ग्रुपका सुलभ अग्रवाल पक्राउ परेका हुन् ।
नेपाल उद्योग परिसंघ (सीएनआई) का उपाध्यक्ष तथा शंकर ग्रुपका संचालक सुलभ अग्रवाललाई अपराध महाशाखाको टोलीले मंगलबारपक्राउ गरेको हो ।
अग्रवालले किर्किस्तानको महाबाणिज्यदूतका रुपमा निलो प्लेटको गाडी प्रयोग गर्दैआएका थिए । उनले कूटनीतिक नियोगको नम्बर प्लेट भएको किर्गिस्तानको बाणिज्यदूतका गाडीमा राखेर थर्मल गन कालोबजारी गर्दै आएको खुलेको छ ।
प्रहरीका अनुसार उनले पाँच हजार रुपैयाँ पर्ने थर्मल गन १५ हजार रुपैयाँमा बिक्री गर्न खोजेको आरोप छ । उनको साथबाट ६७ थान थर्मल गन पनि बरामद भएको छ ।
अग्रवालबाट १६ हजारमा लिएर त्रिपुरेश्वरका तिरुपति, कृष्ण इन्टरप्राइजेज र विशाल सर्जिकलले २० हजार रुपैयाँसम्ममा थर्मल गन बिक्री गर्दैआएका थिए । एन ९५ मास्कको बढीमा ३ सय पर्ने भए पनि अग्रवालले ७ सय रुपैयाँमा बिक्री गर्दैआएको सूचनाका आधारमा प्रहरीले उनको निगरानी गरेको थियो ।
उनले केही दिनअघि नेपाल वायुसेवा निगमको जहाज चार्टर गरी कोरोना भाइरस संक्रमण भए नभएको पत्ता लगाउने इन्फारेड थर्मल गन र एन ९५ मास्क लगायतका मेडिकल सामग्री ल्याएका थिए । ती सामग्रीमध्ये इन्फारेड थर्मल गन ६० हजार पीस ल्याएका थिए ।
अपराध महाशाखाका प्रहरीले ग्राहकको भेषमा अग्रवालसँग मेडिकल सामाग्री खरिद गर्न सम्पर्क गरेका थिए ।








































