काठमाडौं, २० पौष २०७६ । नेपाली कांग्रेसले प्रदेश नम्बर १ बाट राष्ट्रियसभा सदस्यमा प्रतिनिधित्व गर्ने उमेदवारको मनोनयन दर्ता गराएको छ ।
कांग्रेसबाट अन्यतर्फ झापाका राजेन्द्रकुमार घिमिरे, दलिततर्फ पाँचथरका नीरबहादुर विक र महिलातर्फ सुनसरीको धरानकी मीना पुलामी मगरले उमेदवारी दर्ता गराएका हुन् ।
कांग्रेसका उमेदवारहरुले मोरङको विराटनगरस्थित निर्वाचन कार्यालय पुगेर मनोनयन दर्ता गराएको कांग्रेस केन्द्रीय सदस्य डा डिला संगौलाले जानकारी दिइन् । उनले मनोनयन दर्तापछि आयोजित सभालाई समबोधन गर्दै विचार र आस्थाभन्दा माथि उठेर कांग्रेसका उमेदवारहरुलाई मत दिन जनप्रतिनिधिहरुलाई आग्रह गरिन् ।
“राष्ट्रियसभा बौद्धिक, अनुभवी र प्रतिष्ठा भएका व्यक्तिहरु पुग्ने ठाउँ हो । त्यहाँ कांग्रेसको उपस्थिति कमजोर हुँदा सरकार जनताका मौलिक हक, स्वतन्त्रता र गोपनियता हनन् हुने खालका विधेयक एकपछि अर्को गरी ल्याउँदैछ,” उनले भनिन्, “संविधान प्रदत्त हकअधिकारको रक्षाका लागि कांग्रेस त्यहाँ पुग्न जरुरी छ । अब विचार र आस्थाभन्दा माथि उठेर नेपाली कांग्रेसका पक्षमा मत दिन सबै जनप्रतिनिधिलाई आग्रह छ ।”
यसअघि सत्तारुढ नेपाल कम्यनिस्ट पार्टी (नेकपा) ले पनि उमेदवारी दर्ता गराएको थियो ।








































