कास्की, ६ मङ्सिर २०७६ । प्रमुख प्रतिपक्ष दल नेपाली कांग्रेसका सभापति शेरबहादुर देउवाले सरकारमाथि अख्तियारलाई शाही आयोग बनाउन खोजेको आरोप लगाएका छन् ।
पोखरामा शुक्रबार आयोजित कार्यक्रमलाई सम्बोधन गदै सभापति देउवाले संवैधानिक परिषद् कठपुतली बनाएर सम्पूर्ण ठाउँमा आफ्ना मान्छे नियुक्त गरेको आरोप लगाएका हुन् । सभापति देउवाले भने, अख्तियारलाई शाही आयोग बनाउँदैछ ।’ सभापति देउवाले स्वतन्त्र न्यायालय भयो भने सरकारले गलत गरेपनि ठीक गर्न सकिने दाबी गरेका छन् ।
यसैक्रममा, सभापति देउवाले नेपाल बार एशोसिएसनको चुनाव आफ्नै कारण हारेको भन्दै असन्तुष्टि जनाए । उनले बारमा जितेको भए न्याय परिषद्मा प्रतिनिधित्व हुने र सरकारले न्यायपालिकामा हस्तक्षेप गर्दा लड्ने ठाउँ हुने दाबी गरे । उनले भने, ‘त्यो सम्भावना गयो ।’
सभापति देउवाले अब सरकारका गलत कामका विरुद्ध सडक र सदनमा लड्ने जनाए । उनले प्रधानमन्त्री केपी शर्मा ओलीको राष्ट्रवाद कालापानीमा लम्परारवादमा परिणत भएको समेत जनाएका छन् ।








































