काठमाडौं, १७ कात्तिक २०७६ । आगामी मंसिर १४ मा हुने उपनिर्वाचनका लागि प्रमुख दलहरुले आज आफ्ना उम्मेद्वारको टुंगो लगाउने भएका छन् । .
नेकपाको सचिवालय बैठक र कांग्रेसको पदाधिकारी बैठक बसेर उम्मेदवारको टुंगो लागउने तयारी गरेका हुन् ।
नेकपा सचिवालयको बैठक प्रधानमन्त्री निवास बालुवाटारमा बस्नेछ भने कांग्रेस पदाधिकारी बैठक दिउँसो ३ बजे सभापति शेरबहादुर देउवाको निवास बुढानिलकण्ठमा बोलाइएको छ । यसअघि उम्मेदवारको टुंगो लगाउन हिजो बसेको नेकपा सचिवालयको बैठक विना निष्कर्ष टुंगो थियो । बैठकमा तल्लो कमिटीले पठाएका नाममा नेताहरु एकमत नभएपछि बैठकमा निर्णय हुन नसकेको हो ।
यस्तै कांग्रेस सभापति शेरबहादुर देउवा र वरिष्ठ नेता रामचन्द्र पौडेलले हिजो तनहुँमा कास्की–२ को उप–निर्वाचनका उम्मेदवारको विषयमा छलफल गरेका थिए ।
तनहुँमा हुने एक कार्यक्रमका लागि पोखरा हुँदै दमौली पुगेका देउवाले नेता पौडेलसँग सोबारेमा छलफल गरेका थिए । तनहुँ पुग्नुअघि पोखरामा देउवाले कास्की जिल्ला कार्यसमितिका नेता र आकांक्षी उम्मेदवारसँग छलफलसमेत गरेका थिए ।
यसैबीच उपनिर्वाचनका लागि राष्ट्रिय प्रजातन्त्र पार्टीले समेत आजै उम्मेदवारको टुंगो लगाउने भएको छ ।








































