काठमाडौँ, ६ कात्तिक २०७६ । नेपाली काँग्रेसको पदाधिकारी बैठक बस्दैछ । उपनिर्वाचन लगायत समसामयिक विषय र बिहीबार बस्ने काँग्रेस केन्द्रीय कार्यसमितिको बैठकको तयारीका लागि छलफल गर्न आज दिउँसो ३ बजेपछि बैठक बस्न लागेको सहमहामन्त्री डा. प्रकाशशरण महतले बताए ।
पदाधिकारी बैठकमा आगामी मंसिर १४ गते हुने उपनिर्वाचनका लागि पार्टीका तर्फबाट बन्ने उम्मेदवारका बारे छलफलमा केन्द्रीत हुने सहमहामन्त्री महतले जनाएको छ ।
उनले भने, ‘जिल्लाबाट सिफारिस भएर आएका नामहरुमा छलफल हुन्छ । तर कतिपय जिल्लाबाट उम्मेदवारको नाम आइनसकेकाले मोटामोटी छलफल भएपनि निर्णयमा पुग्न बाँकी नै रहनसक्छ,’ । उनले उक्त बैठकमा कास्की लगायतका जिल्लाका बारेमा विशेष छलफल हुनसक्ने जनाए ।
आगामी मंसिर १४ गते विभिन्न ३७ जिल्लामा प्रतिनिधि सभा सदस्य–१, प्रदेश सभा सदस्य–३ र स्थानीय तहको प्रमुख–१, अध्यक्ष–३, उपाध्यक्ष–१ र वडा अध्यक्ष–४३ गरी जम्मा ५२ पदका लागि निर्वाचन हुँदैछ ।
जसमा कास्की निर्वाचन क्षेत्र नं २ मा हुने प्रतिनिधसभा सदस्य निर्वाचनलाई प्रमुख राजनीतिक दलहरुले महत्त्वका साथ लिएका छन् ।त्यस्तै भोलि बिहीबार बस्ने काँग्रेस केन्द्रीय कार्यसमितिको बैठकको तयारीका लागि पनि पदाधिकारी बैठक बोलाइएको काँग्रेसले जनाएको छ ।








































