कास्की, ११ असोज २०७६ । कास्की २ को उपनिर्वाचन नजिकिँदै गर्दा सांसदमा उठ्ने आकांक्षीहरुको चर्चा परिचर्चा सुरु हुन थालेको छ । नेपाल कम्युनिष्ट पार्टी (नेकपा)का वरिष्ठ नेता बामदेव गौतमले कास्कीबाट चुनाव नलड्ने घोषणा गरेलगत्तै नेकपाका स्थानीय नेताहरबीच उम्मेदवार बन्ने होडबाजी सुरु भएको छ । त्यस्तै नेपाली कांग्रेसमा पनि उम्मेदवार बन्ने नेताहरुको लर्को नै लागेको छ ।
नेकपाभित्र तत्कालिन संस्कृतिक पर्यटन तथा नागरिक उड्डयनमन्त्री रहेका यस क्षेत्रका सांसद रवीन्द्र अधिकारीको हेलिकप्टर दुर्घटनामा परी निधन भएपनि यो क्षेत्र रिक्त रहन पुगेको थियो । यससँगै यस क्षेत्रमा अधिकारीकी श्रीमती विद्या भट्टराईलाई नेकपाले उम्मेदवारको रुपमा अघि सार्ने प्रवल सम्भावना देखिएको छ ।
त्यसोत भट्टराईसँगै नेकपाका पूराना नेता सोमनाथ प्यासीको नाम पनि चर्चामा छ । त्यसैगरी पूर्व सांसद तुलबहादुर गुरुङ र धनराज आचार्यको नामपनि चर्चामा छ । तर, भट्टराईलाई अघि सार्दा सहजै जित्न सकिने आकलन स्थानीय नेताहरुको रहेको छ । भट्टराईलाई सहानुभूतिको मत प्राप्त हुने नेताहरुको ठम्याइ रहेको हुँदा भट्टराई नै उम्मेदवार हुन सक्ने बताइन्छ ।
उता कांग्रेसमा गएको निर्वाचनमा स्याङ्जाबाट उम्मेदवार बनी पराजित भएका धनराज गुरुङ र देवराज चालिसेको नाम चर्चाको शिखरमा छ । त्यसोत कांग्रेसबाट सोभियतबहादुर अधिकारी, कृष्ण केसी, शारदा पौडेल, गुरु बराल, वीरेन्द्र विजुक्छे, कृष्ण कार्की र विजयराज आचार्यको नाम पनि चर्चामा छ ।
नेपाली कांग्रेसले सरकारको शैलिबाट जनतामा असन्तुष्टि बढेको निष्कर्ष निकाल्दै कास्कीमा कांग्रेसलाई विजयी बनाउन सहज हुने देखेपछि उम्मेदवारहरुको संख्या पनि बढेको छ ।
त्यसैगरी बामदेव गौतम उठ्दा आफू पनि उम्मेदवार बन्ने बताएका साझा पार्टीका अध्यक्ष रवीन्द्र मिश्रले आफ्नो पार्टीबाट रजनी केसीलाई अघि सार्ने संकेत गरेका छन् । यही संकेत स्वरुप मिश्रले केसीलाई केही दिनअघि मात्र पार्टीको केन्द्रीय सदस्यमा मनोनयन गरेका छन् ।
केसीलाई केन्द्रीय नेताको रुपमा हाइट बनाउन केन्द्रीय सदस्यमा मनोनयन गरेको बताइएको छ । लामो समय नेपाल विद्यार्थी संघ र महिला संघमा क्रियाशिल केसी कुशल वक्ता र सामाजिक अभियान कर्ताका रुपमा कास्कीमा परिचित छन् । यसैलाई आधार बनाएर साझा पार्टीले केसीलाई अघि सार्ने चर्चा पोखरामा छ ।








































