काठमाडौँ, २७ जेठ २०७६ । नारायण रिना मेमोरियल फाउण्डेशनले दुर्घटनामा परी दुबै हात गुमाएकी मेघा घिमिरेलाई उपचारका लागि अमेरिका लैजाने भएको छ ।
पत्रकार सम्मेलनमा फाउण्डेशनका अध्यक्ष रिमा कटुवालले घिमिरेको उपचारका साथै जनावर उद्धार, विद्या आश्रम र बाजुराको विद्यालयलाई फाउण्डेशनले सहयोग गर्न लागेको जानकारी दिनुभयो ।
संयुक्त राज्य अमेरिकामा स्थापना भएको फाउण्डेशनले आज यहाँ पत्रकार सम्मेलन गरी दुबै हात गुमाएकी घिमिरेलाई उपचार लागि अमेरिका लैजान लागेको जानकारी दिएको हो ।
आफ्नो स्वर्गीय बुबा नारायण केसी र स्वर्गीय बहिनी रिना केसीको सम्झनामा स्थापना गरेको उक्त फाउण्डेशनले हरेक व्यक्तिको सुख र दुःखमा काम गर्ने अध्यक्ष कटुवालले बताउनुभयो । “घिमिरेलाई अमेरिका लगेर उपचार गराउनका लागि आवश्यक प्रक्रिया पुरा भइसकेको छ,”–उहाँले भन्नुभयो ।
कार्यक्रममा अध्यक्ष कटुवालले जनावर उद्धार संस्थालाई एक हजार डलर सहयोग हस्तान्तरण गर्नुभएको थियो ।









































