काठमाडौं, २० जेठ २०७६ । नेपाली कांग्रेसका सांसद डा। मिनेन्द्र रिजालले बजेट पुस्तिकाको अनुसूची २ मा त्रुटि भएको भन्दै अर्थमन्त्रीको ध्यानाकर्षण गराएका छन् ।
प्रतिनिधिसभाको आजको बैठकमा सांसद रिजालले बजेट व्यक्तव्यको बुँदा नम्बर २९५ मा कर प्राणालीमा संरचनात्मक परिर्वतन गरी भन्ने विषय अन्तर्गतका ख, घ र ङ मा उल्लेख भएका विषयसँग जोडिएको अनुसूची २ मा राजश्व संकलन जोडिनुपर्नेमा घटाउने काम भएको भन्दै त्रुटि सच्याउन अर्थमन्त्रीको ध्यानाकर्षण गराएका हुन् ।
उनले बजेट पुस्तिकाको यो त्रुटि सामान्य नभएको जिकिर गरे । राजस्वको अनुमान ठिक नभएको अवस्थामा बजेटमाथिको छलफल गर्नु अँध्यारोमा कुरा गरेको जस्तो मात्रै हुने उनको तर्क थियो । उनले भने, “हामीले करका दर परिर्वतन गरेर राजस्व घटाउँदै छौ कि बढाउँदै छौं ? अर्थमन्त्रीज्यूबाट त्यो जानकारी आवश्यक छ । राजनीतिक भवितव्यको सन्त्रासमा बजेटका तालिकाहरु र अनुसूचीहरु पनि भवितव्यमा परेका छन् । भवितव्यमा नपरोस् । राजनीतिक सन्त्रास नलिने परिस्थिति बनोस् ।”
उनले भने, “कर परिवर्तन तथा प्रशासनिक सुधारबाट ५५ अर्ब ५९ करोड रुपैयाँ थप आउँछ भनी लेखिएको छ । वर्तमान स्रोतमा यो परिवर्तनबाट जोडिनुपर्ने हो । वर्तमान स्रोतबाट ११ खर्ब ६७ अर्ब जम्मा हुन्छ भन्नुहुन्छ । यसरी जोड्ने हो भने त्यो भन्दा अगाडिको कोलममा जोड्ने सट्टा घटाएर २०७६–७७ को लक्ष्यमा ११ खर्ब १२ अर्ब राखिएको छ । नयाँ संरचना परिर्वतनबाट कर थपिने हो कि घट्ने हो ? नयाँ परिवर्तनबाट थपिने हो भने जोडिनुपथ्र्यो । कर परिर्वतन र प्रशासनिक सुधार वर्तमान स्रोतमा यो परिर्वतनबाट जोडिनुपर्ने हो ।”
सांसद रिजालले सोमबारको बैठकमा आर्थिक बर्ष २०७६–७७ को राजश्व र व्ययको वार्षिक अनुमान अर्थात् बजेटमाथिको छलफल सुरु हुनु अगावै सभामुखसँग समय मागेर बोल्दै बजेट पुस्तिकामा भएको त्रुटिबारे ध्यानाकर्षण गराएका हुन् ।
