काठमाडौँ , १९ बैशाख २०७६ । नेपाली कांग्रेसले शुरू गरेको जागरण अभियानमा शीर्ष नेताहरू सातै प्रदेशमा पुगेर सम्बोधन गर्ने भएका छन् ।
बिहीवार सभापति शेरबहादुर देउवा निवास बुढानिलकण्ठमा बसेको कांग्रेसको पदाधिकारी बैठकले शीर्ष नेताहरू प्रदेशमा गएर सम्बोधन गर्नुपर्ने निर्णय गरेको हो ।
बैठकले नेपाली कांग्रेसको जागरण अभियानलाई प्रभावकारी बनाउने निर्णय पनि गरेको छ । पछिल्लो समयमा आन्तरिक विवादका कारण कमजोर बन्दै गएको कांग्रेसलाई जागरण अभियानले केही उर्जा दिने अनुमान गरिएको छ ।
सरकार जनचाहना अनुसार अघि बढ्न नसकेको भन्दै बैठकले पछिल्लो सरकार एक पछि अर्को काण्डमा मुछिदै गइरहेको निष्कर्ष निकालेको छ । बैठकमा सभापति देउवा, वरिष्ठ नेता रामचन्द्र पौडेल, महामन्त्री शशांक कोइराला लगायतका नेता सहभागी थिए ।
