काठमाडौं, १३ वैशाख २०७६ । नेपालका पहिलो कम्युनिष्ट प्रधानमन्त्री तथा नेकपा एमालेका पूर्व अध्यक्ष मनमोहन अधिकारीको स्मृति दिवस विभिन्न कार्यक्रम गरी मनाइँदैछ ।
विसं १९७८ सालमा काठमाण्डौमा जन्मेका अधिकारीको २०५६ साल वैशाख १३ गते निधन भएको थियो । लामो राजनीतिक संघर्षको क्रममा उहाँले १७ वर्ष जेल जीवन बिताउनुभएको थियो । पढाइको सिलसिलामा भारतको बनारसमा रहँदा भारत छोडो आन्दोलनमा सहभागि हुँदा उहाँ बनारसमा जेल पर्नुभएको थियो । जेलमा भारतीय कम्युनिष्ट नेतासँगको सम्पर्कमा उहाँ कम्युनिष्ट पार्टीमा संगठित हुनुभएको थियो ।
अधिकारीले २००३ सालमा विराटनगरमा भएको मजदूर हडतालको नेतृत्व गर्नुभएको थियो । अधिकारी २०५१ सालमा देशको पहिलो कम्युनिष्ट प्रधानमन्त्री हुनुभएको हो । जतिबेला नेपालमा कम्युुनिष्टहरुमाथी प्रश्न उठेको थियो । कम्युनिष्टहरु नै विभाजनको संघार तथा विभाजित भईरहेका थिए । त्यस बेला प्रधानमन्त्री बन्नु भएका मनमोहनले नेपाल कम्युनिष्टको सरकार सफल मात्र होइन काम गर्न कति सक्षम छ भनि प्रमाणित गरिदिनु भएको थियो ।
उहाँ नेतृत्वको ९ महिने सरकारले आफ्नो गाउँ आफै बनाउँ, बृद्धभत्ता जस्ता लोकप्रिय कार्यक्रम सुरु गरेको थियो । सो कार्यक्रमको अहिलेसम्म चर्चा हुने गरेको छ । त्यस्ता अरु थुप्रै काम उहा नेतृत्वको सरकारले गरेको थियो । सोही सरकारबाट नेपालमा कम्युनिष्टहरुले विकास गर्न सक्दछन् भनेर नेपालीको मनमा आशा जगाईदिन सक्षम हुनु भएको थियो ।
मनमोहन अधिकारी सादा जीवनशैली र इमानी नेताका रुपमा पनि चिनिनुहुन्छ ।








































