काठमाडौं,५ चैत्र २०७५ । नेपाली काँग्रेसको लामो समयको रस्साकम्सीपछि अनुशासन समितिले पूर्णता पाउने भएको छ । लामो विवादपछि सोमबार राति अनुशासन समिति गठनमा शीर्ष तहमा सहमति जुटेको थियो ।
सहमति अनुसार अनुशासन समितिको संयोजक केन्द्रीय सदस्य भिष्मराज आङदाम्बेलाई बनाइएको छ ।
सोमबार बिहान ११ बजेदेखि केन्द्रीय कार्यसमिति बैठक बस्ने भनिए पनि सहमतिका लागि पटक पटक समय फेरिँदै जाँदा राति ८ बजे पछि बैठक बस्न सम्भव भएको थियो ।
पाँच सदस्यीय समितिमा शेरबहादुर देउवा निकटका किशोरसिंह राठौर र देवेन्द्रराज कंडेललाई सदस्य चयन गरिएको छ । कार्यकर्तामा खुसी सञ्चार गर्ने कांग्रेसको एउटा निर्णय
वरिष्ठ नेता रामचन्द्र पौडेल पक्षका दुई सदस्यको नाम भएपछि अनुशासन समितिले पूर्णता पाउने छ ।
स्रोतका अनुसार नविन्द्रराज जोशी, धनराज गुरुङ, कल्याण गुरुङ, जीवन परियार र प्रदीप पौडेलमध्येबाट दुई जना अनुशासन समितिमा जाने छन् ।
यसैबीच केन्द्रीय कार्यसमिति बैठक मंगलबार दिउँसो २ बजे बस्दैछ । बैठकले निर्वाचन समिति पनि बनाउँदैछ ।
स्रोतका अनुसार मंगलबार राष्ट्रिय सभाका सांसद राधेश्याम अधिकारीको संयोजकत्वमा निर्वाचन समिति बन्ने सम्भावना छ ।
निर्वाचन समितिले मंगलबार नै पूर्णता पाउने समेत बताइएको छ ।
यी दुई समितिको विवादका कारण फागुन १४ पछि केन्द्रीय समिति बैठक बस्न सकेको थिएन ।
विधानको बारेमा समेत अझै किचलो छ ।
