दाङ, २१ माघ २०७५ । दाङमा प्रहरीले हतियार बनाउने कारखाना फेला पारेको छ । प्रहरीले कारखानाबाट ठुलो मात्रामा हतियारसमेत बरामद गरेको छ ।
राजपुर गाउँपालिका, ७ भौवानाकास्थित कारखानामा छापा मारेर प्रहरीले हतियार बरामद गर्नुका साथै हतियार बनाउने ५९ वर्षीय जितबहादुर बुढालाई जिल्ला प्रहरी कार्यालय दाङले सार्वजनिक गरेको हो ।
कारखानाबाट भरुवा बन्दुक ५ थान, एयरगन राइफल ३ थान, १२ बोरको राइफल १ थान, कटुवा पेस्तोल १ थान, ठुलो हतियारको नाल २९ थान र सानो हतियारको नाल १२ थान बरामद भएको प्रहरी प्रमुख एसपी बेलबहादुर पाण्डेले जानकारी दिनुभयो ।
बुढालाई मूलुकी अपराध संहित ऐन २०७४ को परिच्छेद ६ को दफा १२९ बमोजिम हातहतियार तथा खरखजाना सम्बन्धी मुद्दामा अदालतबाट म्याद थप गरेर कारवाही अघि बढाइएको पाण्डेले बताउनु भयो ।
‘द्वन्दकालमा नै बुढाले हतियार बनाउने गरेका रहेछन् । शान्ति प्रक्रियापछि केही समय काम रोकेका उनले तीन वर्ष अघिदेखि फेरि हतियार बनाउन थालेको अनुसन्धानबाट देखियो,’ एसपी पाण्डेले भन्नुभयो, ‘भारतको गब्बापुर र नेपालका केही व्यक्तिका लागि बन्दुक निर्माण गरिदिएको बुढाले स्वीकार गरेका छन् । थप अनुसन्धान गरेर हतियार लैजाने व्यक्तिहरुलाई नियन्त्रणमा लिनेछौं ।’
सोही ठाउँका ३८ वर्षीय रुद्रमणि घर्तीलाई पनि एक थान भरुवा बन्दुकसहित प्रहरीले पक्राउ गरी सार्वजनिक गरेको छ । हतियार बनाउने बुढाकै कारखानाबाट ३ वर्ष पहिले १० हजारमा किनेको भरुवा बन्दुकसहित घर्तीलाई पक्राउ गरिएको पाण्डेले जानकारी दिनुभयो ।
